Qysymǵa qaramastan, Iran beıbit maqsattaǵy ıadrolyq baǵdarlamasyn júzege asyrýdy jalǵastyrady - Irannyń syrtqy ister mınıstri
ASTANA. Jeltoqsannyń 22-si. QazAqparat - Syrtqy qysymǵa qaramastan, Iran «beıbit maqsattaǵy ıadrolyq baǵdarlamasyn júzege asyrýdy qalypty rejımde jalǵastyra beredi».
Bul týraly Beırýtta saparmen júrgen Iran Islam Respýblıkasynyń syrtqy ister mınıstri Manýchehr Mottakı málim etti. Onyń aıtýynsha, ırandyqtar «Tegran reaktoryna qajetti otyndy ózderi óndiredi». Bul týraly ITAR-TASS agenttigi habarlady.
Iranǵa qarsy jańa sanktsııalar engizilý yqtımaldyǵy týraly frantsýz dıplomatııasynyń bastyǵy Bernar Kýshnerdiń qoqan-loqysyna jaýap bergen Mottakı, Parıjge «Djordj Býshtyń ákimshiligine uqsamaýǵa jáne óz abyroıyn saqtaýǵa» keńes berdi.
Iran mınıstri «Kýshner kóp sóıleıdi, jáne onyń aıtqandaryn biz basqalardyń aýzynan estigenbiz», dep málim etti. Ol, sondaı-aq «medıtsınalyq reaktor úshin ýran jetkizý sııaqty gýmanıtarlyq máseleniń ózinde, Batystyń ustanymynda saıası motıvterdiń basym bolǵanyna» ókinish bildirdi.
«Naharet» aqparat agenttiginiń habarlaýynsha, Mottakı keshe Lıvan premeri Saad Harırıdi ulttyq birlik úkimetin jasaqtaýymen quttyqtady jáne Tegranǵa saparmen shaqyrdy. «Lıvandyqtar, óz betterinshe kelisimge kele alatyndaryn jáne syrtqy kúshterdiń aralasýynsyz is bitire alatyndaryn dáleldedi», dedi Mottakı óz sózinde.
