Qysyltaıań kezde jumysshyny qysqartpaý mańyzdy – Baqytjan Nurbaev, kásipker

ORAL. QazAqparat – Qazirgideı qysyltaıań kezde jumysshyny qysqartpaı, bir-birimizge qolushyn soza bilýimiz kerek. Bul týraly batysqazaqstandyq kásipker, «Stroıkombınat» JShS dırektory Baqytjan Nurbaev málim etti, dep habarlaıdy QazAqparat tilshisi.

Onyń aıtýynsha, Prezıdent Qasym-Jomart Toqaevtyń tapsyrmalaryn múltiksiz oryndaýdyń mańyzy zor.

«Memleket basshysynyń osyndaı kúrdeli kezeńde jasaǵan málimdemesi kúlli elge demeý bereri sózsiz. Ásirese, indetke baılanysty qıyn jaǵdaıǵa tap bolǵan, áleýmettik jaǵynan tabysy az azamattarǵa, kóp balaly otbasylarǵa qoldaý kórsetý erekshe mańyzdy. Prezıdent tapsyrmasyna sáıkes otandyq bıznes salasy da umyt qalyp otyrǵan joq. Endeshe, buǵan biz de ispen jaýap berip, óz úlesimizdi qosýǵa tıistimiz», deıdi kásipker.

Onyń sózine qaraǵanda, ózi basshylyq etetin kásiporynda 240 adam eńbek etedi.

«Biz, túptep kelgende, ár jumysshy úshin, olardyń densaýlyǵy úshin jaýaptymyz. Buǵan deıin de eshkimdi qysqartqan joqpyz. Jalaqy ýaqtyly berilýde. Tapsyrystar bar, soǵan sáıkes eńbek etýdemiz. Biz óndiretin keramzıt syndy qurylys materıaldary ózge óńirlerge, sonyń ishinde elordamyzǵa jóneltiledi. Elimizde koronavırýsqa baılanysty tótenshe jaǵdaı jarııalanǵannan beri qaýipsizdik sharalaryna barynsha kóńil bólýdemiz. Tsehtar dezınfekııalanyp, jumysshylar jeke qorǵanysh quraldarymen qamtamasyz etildi. Óz eńbekkerlerimizben qatar qalaǵa da kómek berýdemiz. Mysaly, áıelder úılerinde otyryp, maska tigip jatyr eken. Solarǵa materıal kerek degen soń, qarjylaı járdem berdim. Biz bir bolsaq qana qaı indet pen keseldi de jeńemiz», - dedi QazAqparat tilshisine kásipker ári Oral qalalyq qoǵamdyq keńesiniń tóraǵasy Baqytjan Nurbaev.