Qystyń sýyqtyǵyna baılanysty dári-dármekti paıdalaný kólemi 1,5 esege ósti - Densaýlyq saqtaý mınıstri
ASTANA. Aqpannyń 9-y. QazAqparat /Rýslan Ǵabbasov/ - Dári-dármek baǵasy ósetin bolsa, biz bul máseleni óz ýaqytynda sheshý mindetin alyp otyrmyz. Bul týraly búgin Úkimet otyrysynda Densaýlyq saqtaý mınıstri Jaqsylyq Dosqalıev málim etti,
dep habarlaıdy QazAqparat.
Mınıstrdiń aıtýynsha, bıylǵy dári-dármekpen qamtamasyz etý boıynsha tender eki aı buryn ótkizildi. Osyǵan baılanysty dárilerdi naýryzdyń 1-inen eldi mekenderge jetkizý qarastyrylǵan.
Osy oraıda J. Dosqalıev ótken jyldyń jeltoqsanynda Úkimet basshysy ákimderge 2010 jyldyń qańtary men aqpan aılaryna dári-dármek qoryn qalyptastyrý týraly tapsyrma bergenin eske salyp ótti.
«Atap aıtqanda, barlyq aýrýhanalarda eki aıǵa jetetin dári jınaqtaldy. Alaıda qystyń sýyqtyǵyna baılanysty týyndaıtyn aýrýlardyń deńgeıi bıyl 1,5 esege ósti. Al naýqastardyń kóbeıýi sáıkesinshe dári-dármekti tutyný kólemin arttyryp otyr», dedi mınıstr.
Onyń sózine qaraǵanda, qańtar men aqpan aılaryna daıyndalǵan dárilerdiń kólemi byltyrǵy deńgeıde jınaqtalǵan. «Soltústik óńirlerde jaǵdaı jaman emes, olardyń úsh aptaǵa jetetin dárileri bar. Elimizdiń keıbir aımaqtarynda eki aptaǵa jetetin qor bar. Sondaı-aq Mańǵystaý oblysynda bir aptaǵa jetetin dáriniń qory qalǵan. Osyǵan baılanysty Úkimettiń qaýlysy shyǵyp, endi ár aýrýhanaǵa dári-dármekti bir aılyq mólsherde ózderi jergilikti jerlerdegi farmatsevtıkalyq kompanııalardan satyp alý quqy berildi», dedi vedomstvo basshysy.
Alaıda osy jaǵdaıda paıdalanyp farmatsevtıkalyq kompanııalardyń ókilderi baǵany ósirýi múmkin ekenin jetkizgen mınıstr, «eger dári-dármek baǵasy ósetin bolsa, biz bul máseleni ýaqytynda sheshemiz degen mindetti alyp otyrmyz», dedi.
