Qystyń qamyn jazda oılaıtyn elorda jurty jármeńkege aǵylyp jatyr
ASTANA. 21 qyrkúıek. QazAqparat - Astanada ákimdik aldyndaǵy ortalyq alańda jyl saıynǵy aýyl sharýashylyq jármeńkesi ótip jatyr. Bul joly Ońtústik Qazaqstan jáne Jambyl oblystary óz ónimderin kópshilikke usynýda.
Jambyl oblysynan jalpy quny 50 mln teńgeni quraıtyn 350 tonna ónim ákelindi. Atap aıtqanda, 24 tonna et ónimderi, sút ónimderi, 180 tonna kókónister men jemister.
«Jármeńke tańerteńnen beri ótip jatyr. Biz Jambyl oblysynan keldik, 4 sıyr men 2 jylqynyń etin ákeldik. Birneshe saǵattyń ishinde ótip ketti. Búgin etke suranys joǵary, sebebi bári qysqa daıyndalyp jatyr, baǵasy da tıimdi. Menińshe, elimizde osyndaı jármeńkelerdi jıi uıymdastyrý kerek. Shaqyrsa, elordaǵa jármeńkege taǵy da kelemiz», - dedi astana.kz saıtyna Jambyl oblysynyń ókili Aleksandr Kýtkov.
Óz kezeginde Ońtústik Qazaqstan oblysynan Astanaǵa 48 mln teńgeniń 324 tonna taýary jetkizilip otyr. Atap aıtqanda, 139 tonna kókónis, 22 tonna kartop, baqsha ónimderi, sút ónimderi.
«Árıne, jármeńkedegi baǵalar dúkendegige qaraǵanda tómenirek. Qazir kúz bolǵandyqtan bári qysqa daıyndalyp jatyr. Jármeńke der kezinde ótkizilip jatyr. Azyq-túlikter kóp, assortımenti de mol, baǵasy da qoljetimdi. Elordada osyndaı jármeńkeler jıi uıymdastyrylýy tıis», - dedi astana.kz saıtyna jármeńkege kelgen qala turǵyny Qundyz Januzaqova.
Budan basqa, jármeńkede merekelik baǵdarlama uıymdastyryldy. Elorda turǵyndary men qonaqtaryna ulttyq taǵamdar men tátti-dámdiler usynyldy, etno-aýyl quryldy. Eske salaıyq, Qazaqstan óńirleriniń aýyl sharýashylyq jármeńkeleri 14 qyrkúıek - 3 qarasha aralyǵynda demalys kúnderi ótedi.
