Qystan keıin Astanany abattandyrý qalaı júrip jatyr

ASTANA. QazAqparat - Astanada dástúrli «Jasyl Astana» ekologııalyq aılyǵy jalǵasyp jatyr. Ol 6 mamyrǵa deıin jalǵasady, osy ýaqyt ishinde qalada senbilikter, jappaı aǵash otyrǵyzý jáne basqa da jumystar júrgiziledi, dep habarlaıdy QazAqparat elorda ákimdigine silteme jasap.

Kún raıynyń jylynýymen kommýnaldyq qyzmetter qys mezgilinen keıin qalany tazalaý jumysyn belsendi júrgizip jatyr.

Qoqys jınaýdan bólek, qorshaýlar, eskertkishter, shaǵyn sáýlet nysandary jáne t.b. jýylady.

Sonymen qatar, kún saıyn elordanyń túrli oryndaryna aǵash otyrǵyzylady. Aıta keterligi, japyraqty aǵashtarǵa basymdyq beriledi.

Sonymen qatar, ekoaılyq aıasynda Astanada kommýnaldyq jáne jalpy qalalyq senbilikter ótkiziledi.

Máselen, eńbek ujymdarynyń, qala turǵyndarynyń, ShOB ókilderiniń kúshimen polıgonǵa 800 tonnadan astam qoqys shyǵaryldy.

Jalpy aýdany 4 mln sharshy metr bolatyn saıabaqtar men skverler tazartyldy.

Ekologııalyq aılyqqa 15 myńǵa jýyq adam, 400-den astam kásiporyndar men uıymdar, PIK jáne MIB ujymdary, shaǵyn jáne orta bıznes sýbektileri jáne t.b. qatysty.

Búgin, 29 sáýir kúni Astanada úlken jalpyqalalyq senbilik ótip jatyr.

Uıymdar men kásiporyndar ujymy óz aýmaǵynda aǵash otyrǵyzyp, qoqys jınaıdy, sondaı-aq sý aıdyndarynyń jaǵasyn tazartady.

3 myńnan astam aǵash pen buta otyrǵyzý josparlanyp otyr.