Qystaqtaǵy jasóspirimder uıaly baılanys ustaıtyn jer izdep, joǵalyp ketken
ATYRAÝ. QazAqparat –Atyraý oblysynyń Mahambet aýdanynda jasóspirimder uıaly baılanys ustaıtyn jerdi izdep, joǵalyp ketti, dep habarlaıdy QazAqparat.
Tótenshe jaǵdaılar departamentinen málim etkendeı, 2 maýsymda Qańbaqty qystaǵynan 17 jáne 18 jastaǵy jasóspirimder uıaly telefonmen sóılesý úshin mobıldi baılanys ustaıtyn jerdi izdep shyqqan. Biraq, sol kúni qystaqqa qaıta oralmaǵan.
«Qańbaqty qystaǵy Mahambet aýdanynyń ortalyǵynan 65 shaqyrym qashyqta ornalasqan. Bastapqyda olardy týystary izdestirip, taba almaǵan. Sodan soń, 3 maýsymda Tótenshe jaǵdaılar departamentine habar bergen. Joǵalǵan jasóspirimderdi izdeýge 4 qyzmetker jiberildi», -dep habarlady Tótenshe jaǵdaılar departamentiniń baspasóz qyzmetinen.
Alaıda, qutqarýshylar qystaqqa kelgenge deıin týystary eki jasóspirimdi ózderi taýyp alǵan.
