Qysta nebári 16 gradýs jyly: Mektep dırektory Altaı Kólginovke shaǵymdandy
NUR-SULTAN. QazAqparat - Qala ákimi Altaı Kólginov qysta jylytý júıesi nashar, shatyrynan sý sorǵalaıtyn №75 mektep-lıtseıde bolyp, jaǵdaıdy óz kózimen kórdi, dep habarlaıdy QazAqparat.
Qala ákimdiginen málim etkendeı, A.Kólginovtiń mektep dırektorlarymen kezdesýi barysynda atalmysh oqý ornynyń basshysy mekteptiń nashar jylytylýyna jáne sodan týyndaıtyn birqatar problemalarǵa shaǵymdanǵan. Búgin shahar basshysy aýdan ákimimen jáne Bilim basqarmasynyń basshysymen bilim ordasyna bardy.
«Kúzde, qysta mektep sýyq. Nebári 14-16 gradýs jyly. Ashana, sportzal jáne taǵy birneshe kabınetterdiń shatyrynan sý ketedi. Únemi shelekterdi paıdalanýǵa týra keledi. Kondıtsıonerlerdi qoldanyp aýany jylytamyz degen oı bar. Oqý orny 2014 jyly ǵana salyndy», - dedi mektep-lıtseı dırektory Saltanat Toǵataeva.
A. Kólginov merdiger uıym problemany joıýǵa tıis ekenin atap ótti. «Mektep ǵımaratyna nebári 5 jyl ǵana. Alaıda, shatyry qoldanystan shyǵyp, sý ketip jatyr, temperatýra tek 14-16 gradýsqa jetedi. Buryn salynǵan mektepter jańa mektepter sııaqty jóndeý jumystaryn qajet etpeıdi. Oqý ornynda tehnıkalyq tekserý júrgizý qajet. Merdigerler máseleni sheshý kerek, kepildik merzimi bar. Bilim basqarmasy tarapynan nashar baqylaý júrgizilip jatqany baıqalady! Oqýshylardyń qaýipsizdigin qamtamasyz etý jáne oqýǵa qolaıly jaǵdaı jasaý kerek», - dedi ol.
Oqý orny 2014 jyly
paıdalanýǵa berildi, bıylǵy oqý jylynda mektepke 3700 oqýshy barady.
