Qysta elimizde 1,7 myń adam qutqarylyp, 1,3 myń tehnıka qar qursaýynan shyǵaryldy – TJM
NUR-SULTAN. QazAqparat – Qysqy kezeńde elimizde 1 722 adam, onyń ishinde 230 bala qutqaryldy, 1 300-den astam tehnıka qar qursaýynan shyǵaryldy, dep habarlaıdy QazAqparat.
«Qystyń basynan bastap (2020 jylǵy 1 qarashadan) elimizde 1 135 aýa raıyna baılanysty eskertý jarııalandy. Avtojoldar ýchaskeleri 1 481 ret jabyldy (onyń ishinde respýblıkalyq – 597, oblystyq – 884), júk jáne jolaýshylar avtokólikteri úshin qozǵalys 233 ret shekteldi (respýblıkalyq mańyzy bar - 98 ret, oblystyq – 135). Atalǵan kezeńde elimizdiń qutqarýshylary 1 722 adamdy, onyń ishinde 230 balany qutqardy. 1129 adam, sonyń arasynda 116 bala evakýatsııalandy. 108 jylytý pýnkti jumyldyryldy. Qar qursaýynan 1 300-den astam tehnıka shyǵaryldy», - delingen QR Tótenshe jaǵdaılar mınıstrligi málimetinde.
Belgili bolǵandaı avarııalyq-qutqarý jumystaryna TJM, ІІM, jergilikti atqarýshy organdar men jol qyzmetterinen 10 557 adam jáne 5 245 tehnıka jumyldyryldy.
Qutqarýshylardyń málimetinshe, eń kúrdeli jaǵdaı elimizdiń soltústik jáne ortalyq bóliginde, Almaty oblysynyń «Úsharal-Dostyq» avtojolynyń ýchaskesinde oryn aldy. Jyl saıyn qysqy kezeńde aýa raıy buzylǵan kezde osy ýchaskede 100-den astam júk jáne jeńil avtomobıl qar qursaýynda qalady. Tek 2020 jyldyń qarasha aıynan bastap 2021 jyldyń aqpan aıyna deıingi kezeńde joldyń atalǵan ýchaskesinde qar qursaýynan 490-ǵa jýyq adam qutqarylyp, evakýatsııalandy jáne 200 tehnıka shyǵaryldy.
«Aýa raıynyń qolaısyzdyǵynan zardap shekken adamdardy qutqarý boıynsha avarııalyq-qutqarý jumystary 12 saǵattan astam ýaqytqa sozylatyn kezder de kezdesedi, al keıbir jaǵdaılarda birneshe táýlikke jetedi. Ońtústik-batystan soqqan qatty jel jáne joldyń osy ýchaskesinde qar ustaıtyn qalqandardyń bolmaýy qıyndyqtar keltirdi», - dep atalyp ótken vedomstvo habarlamasynda.
