Qysta balyq aýlaýǵa shyqqanda qandaı qaýipsizdik erejelerin saqtaý kerek

ÓSKEMEN. QazAqparat – ShQO qutqarýshylary qysta balyq aýlaýǵa shyqqanda qandaı qaýipsizdik erejelerin saqtaý kerektigin túsindirdi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, qysta balyq aýlaý óte qaýipti. Sý qoımalaryna kelgen balyqshylar arasynda talapqa saı daıyndalǵandar óte sırek. Olar kóbinese óz ómirlerin qaterge tigip, muzǵa shyǵyp jatady. Shyǵys Qazaqstanda qutqarýshylar qys bastalǵaly beri profılaktıkalyq reıdter júrgizýde.

«Jergilikti atqarýshy organ ókilderimen jáne polıtseılermen birlesip barlyǵy 620-dan astam reıd, 364 nusqaýlyq ótkizildi. Balyqshylarǵa qaýipsizdik erejeleri jazylǵan 5097 paraqsha taratylyp, oblys mektepterinde oqýshylar úshin 29 ınteraktıvti sabaq uıymdastyryldy. Búginde sý aıdyndarynda 18 eskertý jáne tyıym salý belgileri ornatylǵan», - delingen aqparatta.

Osy rette, TJD mamandary qysta balyq aýlaýǵa shyqqanda qandaı qaýipsizdik erejelerin saqtaý kerektigin túsindirdi:

1. Muzdy úlken qylyp oımaı, muz ústine bir ýaqytta kóp adam shyqpaý kerek.

2. Uzyndyǵy 12-15 metrdi quraıtyn arqan bolý kerek, onyń ushyna ilmek jasalýy tıis.

3. Muz ústinde shańǵymen júrgen kezde shańǵynyń izi qalǵan joldarmen ǵana júrińiz.

4.Muzdyń qalyńdyǵy adamdar úshin keminde 10 sm, jeńil avtokólikter úshin keminde 30 sm bolsa qaýipsiz dep sanalady.

5. Muzǵa shyqqan kezde bul týraly aldyn ala týystaryńyzǵa nemese tanystaryńyzǵa habarlańyz.

6. Ózińizben birge qýattalǵan uıaly telefon alyp júrińiz.

7.Balyq aýlaýǵa bara jatqan sý qoımasynyń tereńdigin, taıaz jerlerin jaqsy bilýińiz kerek.

8. Eger qutqarýshylardyń kómegi qajet bolsa, «112» telefonyna qońyraý shalyńyz.