Qysqy Ýnıversıada: short-trekten Qazaqstan erler quramasyna qola júlde buıyrdy

ASTANA. QazAqparat - Búgin Balýan Sholaq atyndaǵy sport saraıynda 28-inshi qysqy Ýnıversıadanyń short-trek baǵdarlamasy boıynsha erler arasynda 5 myń metrlik qashyqtyqta estafeta jarysy márege jetti,  dep habarlaıdy «QazAqparat» HAA tilshisi.

Short-trek boıynsha sońǵy synǵa eń myqty Ońtústik Koreıa, Reseı, Qytaı jáne Qazaqstan quramalary qatysty.

Márege sanaýly metrler qalǵanda, ońtústikkoreıalyq sportshy tártip buzyp, Nurbergen Jumaǵazıevti ıterip, jyǵyp tastady. Sóıtip Qazaqstan quramasyn altynnan aıyrdy dese de bolady. Oılamaǵan jerden qytaılyqtar chempıon atansa, reseılikter kúmis júldeni ıelendi. Ońtústikkoreıalyqtar jarystan shettetilse, qazaqstandyqtarǵa qola medal buıyrdy.

Elimizdiń eńbek sińirgen jattyqtyrýshysy Mádiǵalı Qarsybekov bastaǵan mamandar baptaıtyn Qazaqstan quramasy sapynda batysqazaqstandyqtar Abzal Ájiǵalıev, Aıdar  Bekjanov, Nurbergen Jumaǵazıev jáne atyraýlyq Denıs Nıkısha óner kórsetti.

Sonymen, bul ýnıversıadada Qazaqstan short-trek quramasy altynǵa qol jetkizbegenimen, bir kúmis, tórt qola júldeni enshiledi.

Aıta keteıik, 8 aqpanǵa qaraǵan túni qazaqstandyq shorttrekshiler Belarýs astanasy Mınsk qalasynda ótetin álem kýbogy kezeńine attanady.

Sportshylarymyzǵa endi dúnıejúzilik dodalarda jáne aldaǵy jyly Ońtústik Koreıanyń Phenchhan qalasynda ótetin olımpıada oıyndarynda sáttilik joldas bolsyn deıik.