Qysqy Ýnıversıada-2023: Qazaqstan hokkeıshileri Ońtústik Koreıamen kezdesedi

ASTANA. QazAqparat - Búgin, 12 qańtarda shaıbaly hokkeıden Qazaqstan stýdentter quramasy 2023 jylǵy Qysqy Ýnıversıadada Ońtústik Koreıaǵa qarsy alǵashqy oıynyn ótkizedi, dep habarlaıdy QazAqparat tilshisi.

Qazaqstan men Ońtústik Koreıa stýdentter quramalarynyń kezdesýi elorda ýaqytymen 23:55-te bastalyp, «Qazsport» telearnasynan tikeleı efırde kórsetiledi.

Qysqy Ýnıversıada AQSh-tyń Leık-Plesıd qalasynda 12 jáne 22 qańtar aralyǵynda bolady.

Qazaqstandyq hokkeıshiler Ońtústik Koreıa, Vengrııa, Ulybrıtanııa, Slovakııa jáne AQSh-pen synǵa túsedi. Ózge topta Japonııa, Ýkraına, Shvetsııa, Latvııa, Chehııa quramalary bar.

Qazaqstan stýdentter quramasy dúbirli dodaǵa toǵyz márte qatysty. 1995 jyly Ispanııanyń Haka qalasynda chempıondyq tuǵyrǵa kóterilse, 1993, 2013, 2015, 2017 jyldarda kúmis, 2007 jyly qola medal ıegeri atandy.

Qazaqstan stýdentter quramasynyń kórsetkishi:

2 oryn - 1993 jyl. Zakopane, Polsha

1 oryn - 1995 jyl. Haka. Ispanııa

3 oryn - 2007 jyl. Týrın, Italııa

4 oryn - 2009 jyl. Harbın, Qytaı

4 oryn - 2011 jyl, Erzýrým, Túrkııa

2 oryn - 2013 jyl. Trentıno, Italııa

2 oryn - 2015 jyl. Granada, Ispanııa

2 oryn - 2017 jyl. Almaty, Qazaqstan

4 oryn - 2019 jyl. Krasnoıarsk, Reseı.

Elimizdiń stýdentter quramasy budan keıin 13 qańtarda Vengrııa, 16 qańtarda Ulybrıtanııa, 17 qańtarda Slovakııa, 18 qańtarda AQSh quramasymen sheberlik baıqasady.

Eske salsaq, shaıbaly hokkeıden Qazaqstan stýdentter quramasynyń bas bapkeri qyzmetine Ǵalym Mámbetálıev taǵaıyndaldy.

Foto: dm0qx8t0i9gc9.cloudfront.net