Qysqy UBT: 100-den asa talapkerdiń testileý nátıjesi joıyldy

ASTANA. QazAqparat - Ústimizdegi jyldyń 18-20 qańtar kúnderi ótken bilim synaǵynda 118 talapker UBT tapsyrý erejesin buzyp, olardyń testileý nátıjeleri joıyldy. Bul týraly Ulttyq testileý ortalyǵynyń dırektory Ramazan Álimqulov málim etti, dep habarlaıdy QazAqparat tilshisi.

«Ókinishke qaraı, 118 talapkerdiń testileý nátıjesi joıyldy, onyń ishinde UBT-ǵa 2 bógde adamnyń kirgeni anyqtaldy. Qalǵandarynyń sebepteri ártúrli, ıaǵnı uıaly telefon ustaý, shpargalka paıdalaný jáne taǵy basqa», - dedi ol.

Odan bólek, Ulttyq testileý ortalyǵynyń basshysy suraqtardyń mazmunyna jaýap beretin apellıatsııa komıssııasynyń jumysyna toqtaldy.

«Test suraqtarynyń mazmunyna qatysty respýblıkalyq apellıatsııa komıssııasyna 8 ótinish túsip, onyń 3-ýi qanaǵattandyryldy. Ótken jyldyń nátıjesine kelsek, barlyǵy 243 ótinish túsip, onyń 101-i qanaǵattandyryldy. Atap aıtqanda, 21 durys qurylmaǵan tapsyrma, 56 jaýap kodynyń sáıkes kelmeýi jáne taǵy basqa. Jalpy, bizdiń bazada 120 myńnan astam test tapsyrmasy bar», - dedi R.Álimqulov.

Aıta ketsek, búgin bıylǵy qysqy UBT nátıjesi belgili boldy. Oǵan barlyǵy 34 687 talapker qatysty.