Qysqy trıatlonnan Qazaqstan chempıondary anyqtaldy
ASTANA. QazAqparat - Astanada trıatlon sport túriniń úzdikteri anyqtaldy, dep habarlaıdy QazAqparat tilshisi Sport jáne dene shynyqtyrý isteri komıtetiniń baspasóz qyzmetine silteme jasap.
Qysqy chempıonatqa Elite jáne Age Group sanatyndaǵy sportshylar qatysyp, «standart», «sprınt» qashyqtyǵy boıynsha synǵa tústi.
Jarystyń ashylýynda sóz sóılegen QR Mádenıet jáne sport mınıstri Arystanbek Muhamedıuly qatysýshylarǵa sáttilik tiledi.
Sonymen, Elite sanatynda 1 saǵat 28 mınýt 43 sekýnd nátıjesimen Dmıtrıı Kolomeets (Aqmola oblysy) chempıon atandy. Al áıelder arasynda 1 saǵat 37 mınýt 28 sekýnd ýaqyt kórsetkishimen Natalıa Sakovnına (ShQO) jeńimpaz boldy.
Age Group sanatynda jeke esepte erler arasynda 41 mınýt 50 sekýnd ýaqyt kórsetkishimen Mark Starostıg (Astana qalasy) absolıýtti jeńimpaz atansa, áıelder sapynda Darıa Starostına 51 mınýt 41 sekýnd nátıjesimen úzdik atandy.
Age Group sanatyndaǵy estafetalyq komandalar arasynda «Athletic Family» atty astanalyq komanda 44 mınýt 23 sekýnd ýaqyt kórsetip, birinshi oryn aldy.
Qysqy chempıonattyń jeńimpazdary men júldegerlerine Qazaqstan trıatlon federatsııasynyń prezıdenti Kárim Másimov qundy syılyqtar men sertıfıkattar tabystady.
Sonymen qatar, atalǵan shara aıasynda «TEMIRADAM Challenge» atty qysqy júgirýden jarys uıymdastyryldy. Munda áýesqoı jelaıaqtar 5 jáne 10 shaqyrym qashyqtyqta ózara synasty.
Júgirý saıysynda 10 shaqyrym qashyqtyqta erler arasynda Nurlan Jaqypov (Astana qalasy, 33 mınýt 38 sekýnd) úzdik atansa, al áıelder arasynda Aına Úsenova (Astana qalasy, 47 mınýt 47 sekýnd) jeńiske jetti.
Sondaı-aq, 5 shaqyrym qashyqtyqqa júgirýde 23 mınýt 03 sekýnd ýaqyt kórsetkishimen Aleksandr Mýlıak (Qaraǵandy oblysy) birinshi bolyp kelse. Dál osy qashyqtyqta áıelder arasynda 24 mınýt 59 sekýnd ýaqytymen Dıana Asaýova (Qaraǵandy oblysy) altyn alqa taqty.
Qysqy sport básekesine Astanadan bólek, Almaty, Shymkent qalalary, sondaı-aq Qaraǵandy, Pavlodar, Aqmola jáne Shyǵys Qazaqstan oblysynan barlyǵy 200 adam qatysty. Sonymen qatar AQSh, Chehııa jáne Reseı elderinen áýesqoı sportshylar keldi.
