Qysqy sport túrlerinen «Azııa balalary» oıyndary bastaldy
Áýeli «Kýzbass» muz saraıyndaǵy ulttyq quramalar sherýinde elimizdiń týyn short-trekshi Sanjar Bekejan ustap shyqty.
Aldaǵy kúnderi Qazaqstan osy halyqaralyq jarysta 6 sport túrinen synǵa túsetin 64 atlettiń jolyna úmitpen qaraıdy.
Alǵash ret halyqaralyq jarysqa kelgen Qazaqstan quramasynyń kapıtany Sanjar Bekejan:
«Týdy ustap shyqqanyma qýanyp turmyn. Bul men úshin motıvatsııa. Endi jarys kezinde júlde alýǵa, qasymdaǵy jora-joldastaryma úlgi bolýǵa tyrysamyn. Birinshi halyqaralyq jarys bolǵandyqtan qobaljyp júrmiz. Alaıda daıyndyǵymyz jaqsy»,-deıdi.
Sherýden soń «Azııa balalary» oıyndarynyń týyn alǵash ret tanymal sportshylar ortaǵa alyp shyqty.
Olardyń bári - kezinde osy oıyndarǵa qatysyp, kásibı karerasyn bastaǵan tanymal atletter.
Tý ustaýshy 6 adamnyń qataryna elimizden bokstan Álem jáne Azııa chempıony memlekettik jattyqtyrýshy Mereı Aqshalov shaqyrtý aldy.
«Men de úlken sporttaǵy alǵashqy qadamymdy 2004 jyly ıAkýtsk qalasyndaǵy jazǵy «Azııa balalary» oıyndarynda jasaǵam. Arada 19 jyl ótipti. Qazir trıbýnada otyrǵan jas sportshylardyń qandaı kúıde otyrǵanyn jaqsy túsinemin. Bul olar úshin tájirıbe jınaıtyn, shyńdaıtyn jaqsy alań bolady. Menen basqa Tý ustaǵan 5 sportshy da reseılik eken. Osylaı elep shaqyrǵandary úshin raqmet. Ulttyq quramamyz sátti óner kórsetedi, degen senimdemin», dedi Mereı Aqshalov rásimnen keıingi suhbatynda.
Osydan keıin oıyndar tarıhynan syr shertetin túrli qoıylymdar men kontsert boldy.
Bul qatarda mánerlep syrǵanaýdan 2 dúrkin Olımpıada chempıony Evgenıı Plıýşenko, jas sportshy Aleksandr Plıýşenko men olımpııa oıyndarynyń júldegeri Aleksandra Trýsovanyń arnaıy shoýyn atap ótýge bolady.
Jalpy saltanatty ashylýdy arenadan 5 myńǵa jýyq jankúıer tamashalady.
Búginnen bastap keı sporttaǵy júldegerler anyqtalyp jatyr. Al qazaqstandyqtar júlde jolyndaǵy talasqa 27 aqpannan bastap aralasady (short-trek).
Oıyn 4 naýryzda aıaqtalady. Oǵan deıin barlyǵy 57 medal jıyntyǵy sarapqa salynady.
Qatysýshy elder: Qazaqstan, Armenııa, Aýǵanstan, Belarýs, Kýveıt, Qyrǵyzstan, Lıvan, Nepal, Tájikstan, Taıland, Túrikmenstan, Ózbekstan, Máskeý, Kýzbass qalasynyń quramasy, Qıyr shyǵys federaldy okrýgy, Sibir federaldy okrýgy, Oral federaldy okrýginiń quramasy, Bashqurtstan, Saha, Tatarstan Respýblıkasy quramasy.
Qazaqstan 2019 jyly ótken alǵashqy «Azııa balalary» oıyndaryna 8 sporttan 74 sportshy aparǵan.
Jalpy esepte 7 altyn, 7 kúmis jáne 6 qola medalmen 6-orynnan kóringen. 2019 jyly barlyǵy 11 komanda qatysqan. Bıylǵy oıyndarǵa 12 komanda keldi.
