Qysqy Paralımpıada-2022: Qola júldeger Aleksandr Gerlıts jaıly ne bilemiz
Bul jóninde QazAqparat tilshisi sportshy týraly derekterge kóz júgirtip kórdi.
Qazaqstandyq sportshy parabıatlonnan 10 shaqyrymǵa túregep syrǵanaýda máre syzyǵyn úshinshi bolyp qıyp, elimizdiń atynan bıylǵy básekede júldege qol jetkizgen alǵashqy sportshy atandy.
Atalǵan jarysta altyn medal kanadalyq Mark Arendzge buıyrsa, kúmis júldeni ýkraınalyq Grıgorıı Vovchınskıı aldy.
Aleksandr Gerlıts 1989 jyldyń 31 shildesinde Soltústik Qazaqstan oblysy Aqjar aýdanynda dúnıege keldi.
2011 jyly jol apatyna túsip, oǵan úshinshi toptaǵy múgedektik taǵaıyndaldy. 2014 jyldan bastap ol Ivan jáne Marııa Drobıazko syndy bapkerlerdiń jetekshiligimen shańǵy sportynyń qyr-syryna qanyqty. Ákesi Aleksandr Aleksandrovıch Gerlıts balasynyń árdaıym sportpen aınalysýyna kóńil bóldi.
Alǵash ret ol 2018 jylǵy Paralımpıada oıyndaryna qatysty.
Sondaı-aq, búgin para bıatlonnan otyryp syrǵanaýda Sergeı Ýsoltsev 14, Erbol Hamıtov 16-oryn aldy.
Aıta ketsek, búgingi kúnge deıin qysqy Paralımpıada oıyndarynda el qorjynyna 1 altyn, 1 kúmis medal túsken bolatyn. 1994 jyly 10 shaqyrymǵa klassıkalyq mánerde shańǵy jarysynda qazaqstandyq Lıýbov Vorobeva «kúmis» alsa, 2018 jyly shańǵymen jarysta Aleksandr Kolıadın 1,5 shaqyrymǵa klassıkalyq mánerde sprınt jarysynda chempıon atandy.
Eske salsaq, XIII qysqy Paralımpıada oıyndarynda Qazaqstan atynan Sergeı Ýsoltsev, Aleksandr Gerlıts, Erbol Hamıtov, Denıs Petrenko men ıÝrıı Berezın el namysyn qorǵaıdy.
Endi qazaqstandyq sportshylar 11, 12, 13 naýryz kúnderi aıtýly alamanda baq synaıdy.
Qysqy Paralımpıada 4 jáne 13 naýryz aralyǵynda ótkiziledi. Onda álemniń 50 memleketinen kelgen 700-ge tarta sportshy baq synaýda. Qazaqstan atynan barǵan 5 parasportshy sporttyń eki túrinen jarysqa qatysýda.
