Qysqy Paralımpıada-2022: Qazaqstan medaldar kestesinde 18-orynǵa jaıǵasty
NUR-SULTAN. QazAqparat - 2022 jylǵy XIII qysqy Paralımpıada oıyndarynda Qazaqstan medaldar kestesinde 18-orynǵa jaıǵasty, dep habarlaıdy QazAqparat tilshisi.
Eske salsaq, búgin qazaqstandyq sportshy Aleksandr Gerlıts parabıatlonnan 10 shaqyrymǵa túregep syrǵanaýda máre syzyǵyn úshinshi bolyp qıdy. Osylaısha elimizdiń atynan bıylǵy básekede alǵashqy júldege qol jetkizdi.
Básekede altyn medal kanadalyq Mark Arendzge buıyrsa, kúmis júldeni ýkraınalyq Grıgorıı Vovchınskıı aldy.
Qazirge deıin medaldar kestesinde barlyǵy 19 memleket ornalasqan. Olardyń qatarynda Qazaqstan 18-oryn enshiledi.
Medaldar kestesinde Qytaı 26 medalmen (8 altyn, 8 kúmis, 10 qola) kósh basynda tur. Odan keıin Ýkraına 13 (5 altyn, 5 kúmis, 3 qola), Kanada 13 (5 altyn, 2 kúmis, 6 qola) medalmen úzdik úshtikte keledi.
Jalpy alǵanda júldege qol ilikkender qatarynda Japonııa, Frantsııa, Slovakııa, AQSh, Norvegııa, Germanııa, Avstrııa, Ulybrıtanııa, Jańa Zelandııa, Italııa, Fınlıandııa, Shvetsııa, Nıderlandy, Avstralııa jáne Shveıtsarııa bar.
Qysqy Paralımpıada 4 jáne 13 naýryz aralyǵynda ótkiziledi. Onda álemniń 50 memleketinen kelgen 700-ge tarta sportshy baq synaýda.
Eske salsaq, XIII qysqy Paralımpıada oıyndarynda Qazaqstan atynan Sergeı Ýsoltsev, Aleksandr Gerlıts, Erbol Hamıtov, Denıs Petrenko men ıÝrıı Berezın el namysyn qorǵaıdy.
Endi qazaqstandyq sportshylar 11, 12, 13 naýryz kúnderi aıtýly alamanda baq synaıdy.
