Qysqy Paralımpıada-2022: Búgin el quramasynan kimder synǵa túsedi

NUR-SULTAN. QazAqparat - Qytaı astanasy Beıjiń qalasynda 2022 jylǵy XIII qysqy Paralımpıada oıyndarynda 6 naýryzda qazaqstandyq 2 sportshy el namysyn qorǵaıdy, dep habarlaıdy QazAqparat tilshisi.

Jarystyń alǵashqy kúninde jarys jolyna para bıatlonshylar shyǵady.

Aıta ketsek, saǵat 8.00-de Sergeı Ýsoltsev otyryp syrǵanaýdan 6 shaqyrym qashyqtyqta básekege túsedi. Al saǵat 10.00-de túregep syrǵanaýda Aleksandr Gerlıts 6 shaqyrymdyq jarysqa shyǵady.

Budan keıin qazaqstandyq sportshylar 6, 8, 11, 12, 13 naýryz kúnderi aıtýly alamanda baq synaıdy.

Eske salsaq, XIII qysqy Paralımpıada oıyndarynda Qazaqstan atynan Sergeı Ýsoltsev pen Aleksandr Gerlıtsten ózge Erbol Hamıtov, Denıs Petrenko men ıÝrıı Berezın el namysyn qorǵaıdy.

Qazaqstan sportshylary Paralımpıada oıyndaryna 1994 jyldan beri turaqty túrde qatysyp keledi.

Búgingi kúnge deıin el qorjynyna 1 altyn, 1 kúmis medal tústi. 1994 jyly 10 shaqyrymǵa klassıkalyq mánerde shańǵy jarysynda qazaqstandyq Lıýbov Vorobeva kúmis alsa, 2018 jyly shańǵymen jarysta Aleksandr Kolıadın 1,5 shaqyrymǵa klassıkalyq mánerde sprınt jarysynda chempıon atandy.