Qysqy Olımpıada: Ulttyq quramanyń 80 paıyzy «Dınamo» qoǵamynan shyqqan
NUR-SULTAN. QazAqparat – 28 dınamo sportshysy Beıjińdegi qysqy Olımpıadada Ulttyq quramanyń namysyn qorǵaıdy. Bul týraly QR Іshki ister mınıstrliginiń baspasóz qyzmeti jarııalady, dep habarlaıdy QazAqparat.
«Ótken aptada ulttyq qurama XXIV Qysqy Olımpıada oıyndaryna qatysý úshin Beıjińge ushyp ketti. Qazaqstandyqtar sporttyń 8 túrinen 82 olımpıadalyq lıtsenzııa jeńip alǵan bolatyn. Onyń ishinde bıatlon, short-trek, konkımen júgirý jáne taý shańǵysy sporty, frıstaıl-akrobatıka jáne taǵy basqa sport túrleri bar. Ulttyq olımpıadalyq komanda quramyna kirgen 32 sportshynyń 28-i - dınamoshylar», - delingen mınıstrlik habarlamasynda.
Sonymen birge, táýelsizdik jyldary qazaqstandyq sportshylar jeńip alǵan 72 olımpıadalyq medaldyń 60-y «Dınamo» qoǵamynyń ókilderine tıesili.
Aıta ketý kerek, ulttyq qurama komandalarynyń 80%-dan astamyn dınamo sportshylary quraıdy. Olar ártúrli sport túrleri boıynsha óner kórsetedi. Sondaı-aq 44 olımpıadalyq sport túriniń 36-sy «Dınamoda» daıyndalady.
«Dınamo» dene shynyqtyrý-sport qoǵamy – quqyq qorǵaý organdary qyzmetkerleriniń dene shynyqtyrý jáne arnaıy daıarlyǵyna járdemdesetin eldegi eń kóne sport uıymdarynyń biri.
Toqsan myńnan astam quqyq qorǵaý organdarynyń qyzmetkeri - osy qoǵamnyń múshesi. Olar 15 aýmaqtyq fılıaldaǵy 445 dene shynyqtyrý ujymyna biriktirilgen.
Odan bólek, bul qoǵam - buqaralyq sportty, dene shynyqtyrý-sport qozǵalysyn, jastardy tárbıeleý baǵytynda qyzmet atqaratyn biregeı sport uıymy.
