Qysqy Olımpıada oıyndarynyń ashylýyn 4 arna tikeleı efırden kórsetedi

NUR-SULTAN. QazAqparat - 4 aqpan saǵat 18:00-de «Habar», «Qazaqstan», «Qazsport» jáne «Elarna» telearnalary XXIV Qysqy Olımpıada oıyndarynyń ashylý saltanatyn tikeleı efırde kórsetedi. Bul týraly QazAqparat AQDM silteme jasap habarlaıdy.

Sonymen birge, telearnalar qysqy sporttyń eń tanymal jarys túrleri boıynsha translıatsııalar usynady.

Telearnalardyń shyǵarmashylyq toby Beıjińdegi túsirilim jumystaryn bastady. Top quramynda Sochı Olımpıadasynan aqparat taratqan tanymal jýrnalıst Jandos Aıtbaı, «Habar» telearnasynyń jýrnalısi Amır Sámenbetov, «Qazsport» telearnasynyń tilshisi Azat Qadyrbek, operatorlar Dáýren Jurqabaev pen Esenbek Ákimbaı bar.

Qysqy Olımpıadadan otandyq arnalar 220-dan astam translıatsııa usynady. «Habar» jáne «Elarna» 90-nan astam, «Qazaqstan» jáne «Qazsport» 130 translıatsııa kórsetedi.

Jarystardy tájirıbeli kommentatorlar Aıan Kúshbaev, Raýan Oqas, Evgenıı Akmanov, Erbol Kaırov, Eseı Jeńisuly, Rýslan Baqytjan, Tımýr Súleımenov, Sergeı Raılıan, Ersin Erikuly, Ýálıhan Qosanbaı, Samat Qanaǵatov, Aleksandr Oleınık, Dıdar Qadyrov, Danıla Malyshev, Jiger Ázbergen, Ásem Nurlanova, Lılıana Áljanova jáne Indıra Bektenova júrgizedi.

Telearnalar ár jarys kúniniń qorytyndysy boıynsha Olımpıada kúndelikterin usynady.

Teleefırden bólek, Olımpıada oıyndarynyń televızııalyq translıatsııalary arnalardyń resmı saıty, mobıldi qosymshasy jáne youtube-arnalarynan kórsetiledi.