Qysqy Azııa oıyndarynyń tarıhynda bıyl tuńǵysh ret Alaý estafetasy uıymdastyrylmaq - S. Quranbek

Bul jaıynda búgin Almatyda 7-Qysqy Azııa oıyndarynyń Alaý estafetasy dırektsııasy basshysynyń orynbasary Sársen Quranbek osy sharaǵa daıyndyq barysynda málim etti.

Onyń aıtýynsha, alaýdyń saltanatty túrde tutanýy 11 qańtar kúni Kýveıt qalasynda bastalyp, 12 qańtarda Almatyǵa jetkizilmek. «Bul is-sharaǵa Azııa olımpıadalyq keńesiniń prezıdenti Ál-Sabaq myrza jáne Qazaqstan tarapynan uıymdastyrý komıteti tóraǵasynyń orynbasary, QR Týrızm jáne sport mınıstri Temirhan Dosmuhamedov qatysady dep kútilýde», -dedi ol.

Sonymen qatar ol 2011 jyly elimizdiń táýelsizdigine 20 jyl tolatyndyǵyn jáne osy mereıtoıdyń shymyldyǵyn alaý estafetasy ashatyndyǵyn aıtyp ótti. «Osyǵan sáıkes biz Qazaqstannyń damyp, órkendeýine úles qosyp júrgen azamattarymyzdy alaýger retinde iriktep aldyq», -deıdi S. Quranbek.

Onyń aıtýynsha, respýblıkalyq komıssııa qurylyp, onyń quramyna «Nur Otan» HDP-nyń basshylary, Parlament Májilisiniń depýtattary, ataqty sportshylarymyz jáne sport jýrnalısteri, sonymen qatar Týrızm jáne sport mınıstrliginiń ókilderi kirgen. Osy komıssııada alaý estafetasynyń alaýgerler quramyn jasaqtaý týraly ereje bekitilgen. Nátıjesinde barlyq óńirlerde oblys ákimi nemese onyń orynbasarlary basqaratyn aımaqtyq komıssııa qurylyp, sapaly irikteý júrgizilgen.

S. Quranbek 2008 jyly Beıjiń-2008 olımpıadasynyń alaý estafetasy Almatyda óte joǵary dárejede uıymdastyrylǵanyn aıta kele, qysqy Azııa oıyndarynda alaý estafetasyn ótkizýdi elimiz alǵashqy bolyp usynys jasaǵandyǵyn aıtady. «Qysqy Azııa oıyndarynda buryn-sońdy alaý estafetasy ótkizilmegenin eskerip, Azııa olımpıadalyq keńesine osy estafetany ótkizý týraly usynys jasaǵan edik, olar tolyqtaı maquldap, bekitti», -dedi S. Quranbek .

Alaý estafetasynda Ábjan Jarmuhamedov, Jaqsylyq Úshkempirov, Dáýlet Turlyhanov, Ilıa Ilın, Bahyt Sársekbaev, Bahtııar Artaev syndy elimizdiń ataqty sportshylary alaýger bolmaq.