Qysqy Azııa oıyndarynyń medıtsınalyq qaýipsizdigin qamtamasyz etýge medıtsınalyq qyzmet daıyn - T.Dúısenov
nbsp; ALMATY. Qazannyń 25-i. QazAqparat /Erbol Azanbek/ - Astana men Almatyda ótetin VII qysqy Azııa oıyndarynyń medıtsınalyq qaýipsizdigin qamtamasyz etýge medıtsınalyq qyzmet tolyq daıyn. Bul týraly búgin Almatyda ótken baspasóz máslıhatynda VII Qysqy oıyndardyń medıtsınalyq qaýipsizdik jónindegi bas sarapshysy, FIVB MOK doktory Tólegen Dúısenov aıtty.
Onyń aıtýynsha, oıyndar kezinde medıtsınalyq qaýipsizdikti qamtamasyz etý boıynsha arnaıy baǵdarlama jasalǵan. Bul boıynsha sporttyq sharalar ótetin oryndarda, jattyǵý alańdarynda, qonaqúıler men baspasóz ortalyqtarynda, oıynǵa qatysty basqa da nysandarda medıtsınalyq beketter ornalasatyn bolady.
"Bular tolyqtaı qajetti quraldarmen jabdyqtalǵan. Sondaı-aq qosymsha eki qaladaǵy medıtsınalyq mekemeler de daıyn. Bul rette QR Densaýlyq saqtaý mınıstriniń buıryǵy boıynsha Almatydaǵy 10, Astanadaǵy 6 medıtsınalyq mekememen oıynǵa qatysýshylarǵa tegin medıtsınalyq kómek kórsetý týraly kelisim jasaldy. Sondaı-aq oıyn nysandarynda medıtsınalyq kómek kórsetýdi arnaıy mamandarmen qatar medıtsınalyq oqý oryndarynyń 4-5 kýrs stýdentterinen quralǵan eriktiler júzege asyrady. Barlyq nysandarda qańtardyń 15-nen aqpannyń 15-ne deıin medıtsınalyq kólikter qyzmet kórsetedi", - dedi T.Dúısenov.
