Qysqy Azııa oıyndarynyń kelesi astanasy - Sapporo
ASTANA. 31 qańtar. QazAqparat /Jasulan Amanbaıuly/ - Qysqy Azııa oıyndarynyń kelesi astanasy Japonııanyń Sapporo qalasy bolyp tanyldy. Bul týraly búgin Astanada Azııalyq olımpıada keńesiniń tóraǵasy sheıh Ahmad Al-Fahad al-Sabah myrza baspasóz máslhatynda málim etti.
«Búgin bizde keńestiń otyrysy ótti. Onda keńeske múshe memleketter ókilderi Qysqy Azııa oıyndarynyń ótetin kelesi aımaǵy Japonııanyń Sapporo qalasy bolsyn dep sheshti»,-dedi Ahmad al-Sabah myrza.
Onyń aıtýynsha, búkil olımpıadalyq keńestiń músheleri Sapporo qalasynda osy syndy sporttyq dodalardy ótkizýdiń mol tájirıbesi bar dep sanaıdy. Ol bunyń aldynda óziniń sporttyq keshenderinde qysqy jarystardy qabyldaǵan kórinedi.
«Sondyqtan Qysqy Azııa oıyndarynyń kelesi astanasy bolyp Sapporo qalasy tańdalyp alyndy. Bul oqıǵanyń búkilálemdik mańyzy bar. Sebebi qysqy olımpıadalyq oıyndardy ótkizetin qalalar sanaýly. Bizdińshe ol qalada oıyndar óte joǵary deńgeıde ótetindigine senemiz»,-dep atap kórsetti ol.
