Qysqy Azııa oıyndarynyń birinshi kúniniń nátıjesi: Qazaqstan quramasy 1-orynda
ASTANA. 31 qańtar. QazAqparat /Gúlmıra Álıakparova/ - 7-qysqy Azııa oıyndarynyń alǵashqy kúniniń nátıjesi boıynsha, Qazaqstannyń ulttyq quramasy beıresmı jalpy komandalyq esepte kósh bastap keledi.
Qazaqstan qorjynynda barlyǵy 19 medal bar, onyń 6 -ýy altyn, 7 - kúmis jáne 6 - qola.
Qazaqstannan keıingi ekinshi orynda japondyq sportshylar keledi. Olardyń esebinde barlyǵy 9 medal (3 altyn, 3 kúmis, 3 qola) bar.
Úshinshi orynda segiz medalmen - Koreıa (4 altyn, 3 kúmis, 1 qola), tórtinshi orynda bes medalmen Qytaı (1 altyn, 1 kúmis, 3 qola) keledi. Alǵashqy bestikti bir qola medaldy qanjyǵalaryna baılaǵan Mońǵolııa sportshylary túıindep otyr.
31 qańtar kúni Qysqy Azııa oıyndary aıasynda Almatyda jarystar sporttyń 7 túrinen ótti. Atap aıtqanda, "Shymbulaq" taý shańǵysy bazasynda erler men áıelderdiń joǵarydan quldılaý jarystary; "Tabaǵan" sporttyq-saýyqtyrý kesheninde frıstaıldan irikteý syny, mogýldan áıelder jáne mogýldan erler arasyndaǵy saıystar; Halyqaralyq shańǵymen tuǵyrdan sekirý kesheninde 125 (K-125) metr bıiktikten sekirýden jeke jarystar; Balýan Sholaq atyndaǵy sport saraıynda hokkeıden Qytaı-Koreıa jáne Qazaqstan-Japonııa áıelder quramalarynyń oıyndary; Soldat shatqalyndaǵy Shańǵy-bıatlon stadıonynda 1,2 shaqyrymdyq sprıntten - áıelder, al 1,6 shaqyrymdyq sprıntten erler arasyndaǵy jarystar, sondaı-aq áıelder arasyndaǵy 7,5 shaqyrymdyq sprınt saıysy, shańǵymen baǵdarlaýdan erlerdiń jáne áıelderdiń sprınt jarystary ótti.
Al Astanada sportshylar sporttyń úsh túri boıynsha synǵa tústi. Máselen, «Alaý» sport saraıynda konkımen júgirý sportynan áıelder 3000 metrge, erler 5000 metrge, Respýblıkalyq velotrekte short-trekten áıelder 1500 metrge, erler 1500 metrge jarysty. Sondaı-aq hokkeıden erler komandalary arasynda kezdesýler ótti. Alańda Taıpeı-Koreıa, Qytaı-Japonııa, BAÁ-Bahreın, Mońǵolııa-Qyrǵyzstan, Taıland-Kýveıt komandalary kezdesti.
Aıta keteıik, 7-qysqy Azııa oıyndarynda 27 memlekettiń ulttyq quramalary baq synaýda. Oıyndar sporttyń 11 túrinen ótýde. Onyń 7-ýi - Almatyda, 4- Astanada ótedi.
