Qysqy Azııa oıyndary qarsańynda Astanadaǵy Muńaıtpasov kóshesi kúrdeli jóndeýden ótedi

Bul týraly búgin Eýrazııa gýmanıtarlyq ınstıtýtynda jurtshylyqpen kezdesken atalmysh aýdan ákimi Sapar Ahmetov málim etti, dep habarlaıdy QazAqparat.

Ákimniń aıtýynsha, aǵymdaǵy jyly Almaty aýdanynda 20 kóshege jóndeý jumystary júrgiziledi. Onyń ishinde 2011 jyly Qysqy Azııa oıyndary ótkiziletin «Qazaqstan» jáne «Alataý» sport keshenderi ornalasqan - Muńaıtpasov kóshesi kúrdeli jóndeýden ótetin bolady. Atalmysh shara qarsańynda qaıta qalpyna keltirý jumystary sondaı-aq, Táýelsizdik kóshesi men Abylaı han dańǵylynda júrgizilmek.

S.Ahmetov, bul is-sharalardan aýdanǵa qarasty kentter men shaǵyn aýdandardaǵy kóshearalyq joldar da tys qalmaıdy, dedi. Máselen, josparda Kazgorodok pen basqa da kentter jáne Ońtústik-shyǵys shaǵyn aýdany bar.

Al L.Gýmılev atyndaǵy Eýrazııa Ulttyq ýnıversıtetiniń ókili Ysmaıylov Amangeldiniń: «Jumabaev kóshesinde jóndeý jumystary qashan aıaqtalady?» - degen saýalyna: «Atalmysh ýchaskede jer asty kommýnıkatsııalyq júıelerdi tartý jumystary jospar boıynsha ústimizdegi jyly aıaqtalyp, kóshe qıylystarynda baǵdarshamdar ornatylatyn bolady», - degen jaýap aldy.