Qysqy Azıada oıyndary Qazaqstanǵa ekonomıkalyq jaǵynan tıimdi - Azııa oıyndaryn uıymdastyrý komıteti
ASTANA. Qyrkúıektiń 27-si. QazAqparat /Jasulan Amanbaıuly/ - Qazaqstan Qysqy Azıadaǵa keletin týrıstterden úlken ekonomıkalyq oń áser alady.
Bul týraly búgin baspasóz máslıhatynda Týrızm jáne sport mınıstrliginiń keńesshisi, 7-shi qysqy Azııa oıyndaryn uıymdastyrý komıtetiniń atqarýshy dırektsııasy» AQ-nyń vıtse-prezıdenti Evgenıı Nıkıtınskıı aıtty.
E. Nıkıtınskııdiń paıymdaýynsha, árbir týrıst Qazaqstanǵa shamamen 2 myń AQSh dollaryn tastap ketedi. «Qazirgi ýaqytta keletin paıda týraly áli aıtý qıyn. Ol týrısterdiń sanyna baılanysty. Degenmen Qazaqstanda bir sheteldik týrısttiń standartty qarjylyq shyǵyndary eseptelgen. Onyń kólemi - 2 myń dollar. Árbir týrıst óziniń saıahattap jatqan elinde orta eseppen 2 myń dollar aqsha qaldyratyny anyqtaldy. Mine, osydan-aq elimizge Azıada - 2011 sharasynan keletin ekonomıkalyq oń áserdi baǵamdaı berińizder», deıdi ol.
Uıymdastyrý komıteti Aq Azıadaǵa keletin týrısterdiń sany keminde 10 myń shamasynda bolady dep boljaýda. Budan bólek, Astana jáne Almaty qalasynda ótkeli otyrǵan sharaǵa sportshylar, resmı qonaqtar, jattyqtyrýshylar, sheteldik BAQ ókilderi, tóreshiler korpýsy bar, barlyǵy 4,5 myń adam bolady. TMD elderiniń ultyq olımpıadalyq komıtet basshylaryn, sonymen qatar 45 memleketten olımpıadalyq komıtet ókilderi shaqyrylǵan.
2011 jylǵy qańtardyń 30-y men aqpannyń 6-sy arasynda ótetin qysqy Azııa jarystary ishinde shaıbaly hokkeı oıyny «Qazaqstan» sport kesheninde, taý shańǵysy jarystary «Shymbulaq» bazasynda, dopty hokkeı «Medeý» muz aıdynynda, frıstaıl básekeleri «Tabaǵan» sporttyq-saýyqtyrý kesheninde, áıelder arasynda ótetin hokkeı oıyndary Balýan Sholaq atyndaǵy sport saraıynda, tuǵyrdan sekirýshiler álemdegi úshinshi halyqaralyq shańǵy tramplınderiniń biregeı sport nysanynda ótetin bolady.
Aıta keteıik, osyǵan deıin qysqy Azııa oıyndary Japonııa, Qytaı jáne Ońtústik Koreıada ótkizildi. Alǵash ret ol 1986 jyly Kúnshyǵys eliniń Sapporo qalasynda jalaýyn kóterdi.
