Qysqartýǵa ushyraǵan qyzmetkerlerge kómek kórsetiledi - Eńbek mınıstri
ASTANA. QazAqparat - 2018 jyldyń alǵashqy toqsanynda Qazaqstanda qysqartýǵa ushyraǵan qyzmetkerlerge kómek kórsetý boıynsha 600 jol kartasy ázirlenedi, dep habarlaıdy QazAqparat tilshisi.
Bul týraly QR Eńbek jáne halyqty áleýmettik qorǵaý mınıstri Mádına Ábilqasymova mınıstrlik alqasynyń keńeıtilgen jıynynda málim etti.
"Qysqartýǵa ushyraǵan qyzmetkerlerdi qaıta daıarlaý jáne jumysqa ornalasýyna kómektesý maqsatynda 2017 jyly elimizdegi iri kásiporyndarmen jol kartalary ázirlendi. 2018 jyldyń alǵashqy toqsanynda 600 jol kartasyn bekitý josparlanyp otyr. Qazirgi ýaqytta 168 jol kartasy bekitildi. Osyǵan baılanysty ákimdikpen birlesip, birinshi toqsan sońyna deıin jol kartasyn bekitý kerek jáne jumys kúshi bosap qalýy múmkin kásiporyndardy anyqtaıtyn turaqty monıtorıng uıymdastyrý qajet", - dep atap ótti Mádına Ábilqasymova mınıstrlik alqasynyń keńeıtilgen otyrysynda.
Onyń aıtýynsha, 2018 jyly ózin ózi jumyspen qamtyǵandardy rásimdeý men eńbek kúshi aǵynyn basqarý boıynsha óńirlik jol kartalaryn júzege asyrýdy jolǵa qoıyp, óńirlik shtabtardyń jumysyn jandandyrý qajet.
"Memleket basshysynyń tapsyrmasyna sáıkes, formaldy emes jáne ózin-ózi jumyspen qamtyp otyrǵandardyń jumysyn zańdastyrý boıynsha Zań jobasyn ázirleýdi jedeldetý qajet. Onda ózin-ózi jumyspen qamtyǵandardyń mártebesine naqty anyqtama beriledi, tirkeýdi ońtaılandyrady jáne salyqtyq jeńildikter usynylady", - dep óz sózin tolyqtyrdy M. Ábilqasymova.
Eske sala ketsek, Nursultan Nazarbaev 9 aqpan kúni ótken Úkimettiń keńeıtilgen otyrysynda ózin-ózi jumyspen qamtyǵandarǵa qatysty Eńbek jáne halyqty áleýmettik qorǵaý mınıstrligin synǵa alǵan bolatyn.
Úkimettiń keńeıtilgen otyrysynan keıin atalǵan mınıstrliktiń basshysy aýysyp, vedomstvoǵa jetekshilik etýge Mádına Ábilqasymova kelgen edi.
