Qysqa merzimdi ekonomıkalyq ındıkator 106,9 paıyzdy qurady - mınıstr
ASTANA. 16 aqpan. QazAqparat /Rýslan Ǵabbasov/ - Bıylǵy jyldyń qańtar aıynda qysqa merzimdi ekonomıkalyq ındıkator 106,9 paıyzdy qurady.
Bul týraly búgin bıylǵy jylǵa arnalǵan makroekonomıkalyq kórsetkishter boljamyn naqtylaý týraly Úkimet otyrysynda Ekonomıkalyq damý jáne saýda mınıstri Janar Aıtjanova málim etti.
«Ótken jyldyń qańtar aıyna qaraǵanda, bıylǵy jyldyń qańtar aıynda qysqa merzimdi ekonomıkalyq ındıkator 106,9 paıyzdy qurady. Al ónerkásip óndirisi 5,8 paıyzǵa, qurylys jumystarynyń kólemi 2,2 paıyzǵa ósip, bólshek saýda taýar aınalymy 11,1 paıyzǵa, sondaı-aq kólik qyzmeti 7 paıyzǵa artty»,-dedi vedomstvo basshysy.
Mınıstrdiń sózine qaraǵanda, aǵymdaǵy jyldyń qańtar aıynda halyqaralyq valıýta qory álemdik ekonomıkanyń ósý jónindegi boljamyn 4,2 paıyzdan 4,4 paıyzǵa deıin ulǵaıtý jaǵyna qaraı túzetti.
