Qysqa daıyndyq: ShQO-daǵy 386 jol ýchaskesinde baqylaý kúsheıtilgen

ÓSKEMEN. QazAqparat – Shyǵys Qazaqstan oblysynyń qutqarýshylary qys mezgiline daıyndalý ústinde, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha qar jıi basatyn jalpy uzyndyǵy 816 shaqyrymdy quraıtyn 386 jol ýchaskesinde baqylaý kúsheıtilgen. Jolda qalǵandarǵa kómek kórsetetin 19 jylytý pýnkti bar. Sondaı-aq táýlik boıy 4 trassalyq-medıtsınalyq qutqarý pýnkti jumys isteıdi.

«Jeke quramnan 3 123 adam, 406 qar tazalaıtyn, 214 ınjenerlik, 96 evakýatsııalyq jáne 153 ótimdiligi joǵary tehnıka saqadaı saı. Bul tehnıkalar «Óskemen-Altaı-Úlken Naryn-Katonqaraǵaı-Rahman qaınarlary», «Óskemen-Shemonaıha-RF shekarasy», «Óskemen-Semeı», «Óskemen-Tarǵyn-Samar», «Terekti-Ýrýnhaıka-Tósqaıyń» tasjoldarynyń mańyna qoıyldy», - dedi basqarma bastyǵynyń mindetin ýaqytsha atqarýshy Dmıtrıı Tıtov.

Qar kóshkini júrý qaýpi bar kezeńde mamandar apta saıyn tıisti ýchaskelerdi tekseredi. Qajet bolǵan jaǵdaıda profılaktıkalyq kóshkin júrgiziledi.

«Aýa raıy jaǵdaıy nasharlaıtyny boljanǵan kezde turǵyndarǵa «Dármen» mobıldi qosymshasy, BAQ ókilderi men áleýmettik jeli arqyly eskertýler jasaımyz. Júrgizýshiler joldardyń jaǵdaıy týraly aqparatty únemi qadaǵalap otyrýy kerek», - dedi D.Tıtov.