Qysqa balaq, jarasymsyz saqaldylardy baıqamaǵan syńaı tanytyp, quqyqtyq shekteý arqyly jaýapqa tarta almaı kele jatyrmyz - senator M. Baqtııaruly
Sóz arasynda depýtat qasıetti Ramazan aıynyń basynda Aqtóbe qalasynda oryn alǵan terakti saldarynan jazyqsyz jandardyń qaza tabýy barsha qazaqstandyqtardy dúr silkindirgenin atap ótti. Onyń paıymynsha, bul dinı aǵymnyń artynda mol qarjy men surqııa saıasat turǵany aqıqat. «Elimizde dástúrli emes saıasılanǵan ıslam yqpalyna úıirýshilerdiń dinı ustanymdary bizdiń ultymyzdyń myńdaǵan jyldar boıy ustanyp kele jatqan dástúrli dinimizge múldem qaıshy, kóp jaǵdaılarǵa agressııalyq sıpatta kórinedi. Ókinishke qaraı, qasıetti dinimizdi kúnkóristiń tásiline, teketirestik pen óshpendiliktiń aılasyna aınaldyrǵan dástúrli emes dinı aǵymdar kúndelikti ómirde kórinis berip jatyr.
Keıbir meshit aldynda túri qazaq, biraq qazaqqa múldem jat, arabtanǵan beınesimen jarnama jasap turǵan teris aǵymdaǵy baýyrlarymyzdy, Qazaqstan musylmandary dinı basqarmasynyń ımamynyń ýaǵyzyn qulaqqa ilmeı, ashyqtan ashyq narazylyq tanytyp júrgen, qysqa balaq, jarasymsyz saqaldylardy osy kezge deıin baıqamaǵan syńaı tanytyp, quqyqtyq shekteýler arqyly jaýapqa tarta almaı kele jatyrmyz. Osy oraıda, oı-sanasy áli tolyq qalyptasyp bolmaǵan jastarymyzdy jat aǵymdaǵy dinı baǵyttarǵa kimder tartyp jatyr, kim ýaǵyz aıtyp júr degen máselege nazar aýdarý kerek edi. Bul barsha qoǵamdy oılandyratyn ári jedel shara qabyldaýdy qajet etetin jaǵdaı», dedi senator.
Onyń aıtýyna qaraǵanda, dinı ekstremızm men jat aǵymdardyń elimizdiń qaı óńirinde bolmasyn taralýy dinı saýatsyzdyqtan týyp otyr. Sonymen qatar, depýtat Qazaqstandaǵy kóptegen ımamdardyń dinı saýattylyǵyn synǵa alyp, olardyń sheshendik óneri men ýaǵyzynyń tómendigin, áńgimesiniń ómirden tym alshaqtyǵyna nalydy.
«Bizdiń dinı ustanymymyz el birligi bolýy tıis. Olaı bolsa, elimizdegi dástúrli emes jat aǵymdardy shekteıtin batyl saıası sheshim, quqyqtyq retteý, aqparattyq túsindirý men ǵylymı saraptaý, qoǵamdyq dinı oı salalaryna tujyrymdar tez arada jasalýy tıis. Máselen, Ózbekstan, Tájikstan sekildi baýyrlas elder tájrıbesinde olar óz táýelsizdikterine qaýip tóndiretin dástúrli emes barlyq dinı aǵymǵa áldeqashan zańdy shekteý qoıǵan. Saýatty ımamdar daıarlaý, olardyń biliktiligin arttyrý arqyly ımamdardyń tek dinı emes, zaıyrly bilim úırenip, sheshendigi, kelbeti, júris-turysy kórkem minezdiligine mán berilse. Múmkin arnaıy qor qurý arqyly Qazaqstan musylmandary dinı basqarmasyna qarasty meshitterde qyzmet jasaıtyn barlyq moldalar men ımamdarǵa aılyq jalaqyny tóleý júıesin qolǵa alatyn kez kelip jetti. Elimizdegi dástúrli dinimizge kóleńke túsiretin saıttardyń, ásirese «VKontakte» áleýmettik jelisindegi jaýapkershilikti barynsha qataıtý, qajet bolsa jaýyp tastaý tetikterin jasaý kerek. Elimizdiń qaýipsizdigine nuqsan keltiretin radıkaldy dinı aǵymdaǵy kózqarasty myǵym ustanyp, ony nasıhattap júrgen azamattardy memlekettik qurylym, orta jáne arnaýly oqý oryndaryna, buqaralyq aqparat quraldarynda jumys isteýine tyıym salý kerek», dedi M. Baqtııaruly.
