Qyshqala qalashyǵynda arheologııalyq qazba jumystary bastaldy - Qyzylorda oblysy
Arheologııalyq qazba jumystary Qyzylorda oblysynyń Tarıhı jáne mádenı muralardy qorǵaý jáne paıdalaný jónindegi ǵylymı-ádistemelik keńestiń sheshimimen qolǵa alynyp otyr. Qazba jumystaryn elimizge belgili tarıhshy-arheolog Madııar Eleýov basshylyq etetin «Arheolog» halyqaralyq ǵylymı-zertteý ortalyǵy júrgizýde. Joba Tuńǵysh Prezıdent-Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy jáne «Uly dalanyń jeti qyry» maqalasy aıasynda júzege asyrylyp otyr.
Bul baǵytta burynǵy jyldarda da nátıjeli jumystar jasalyp keldi. Sońǵy jyldardaǵy arheologııalyq zertteýlerdiń basty baǵytynyń biri - HІІІ-HV ǵasyrlarmen shamalanatyn Qyshqala orta ǵasyrlyq qalashyǵy qaldyqtary. Neǵurlym mańyzdy eskertkish sanalǵan arheologııalyq nysannyń shaǵyn ǵana bóligine aldyn ala júrgizilgen qazba nátıjesi boıynsha Qyshqala iri saýda-qolóner qalalarynyń biri dep boljaýǵa bolady.
«Arheolog» ortalyǵynyń basshysy Madııar Eleýovtiń aıtýynsha, qala Jibek joly boıyndaǵy eń mańyzdy ótkeldiń birinde ornalasqan. Ol búgingi kúnge deıin saqtalǵan Tomarótkel janynan boı kótergen. Tabylǵan qysh ydystardyń synyqtary boıynsha joramaldasaq, qalashyq qurylysy H-HІ ǵasyrlarda bastalǵan. Al qaınaǵan ómir HІІІ ǵasyrdyń ekinshi jartysynda Altyn Ordanyń saýda baılanystary jandanýy bastalǵanǵa deıin toqtaǵan.
Qalada ishki saýda damyǵany ańǵarylady. Jalpy 30 gektarǵa jýyq aýmaqty alyp jatqan shahardyń soltústik shetinde qyshtan soǵylǵan úlken saraıdyń qaldyqtary saqtalǵan. Bul jerdiń sheberleri kóptegen san alýan sharýashylyq, turmystyq jáne quıma qyshyn daıyndaǵan. Jekelegen úı-jaılardyń kóshege qaraıtyn aldyńǵy betteri oıyp jasalǵan kirpishtermen áshekeılengen.