Qys mezgilindegi tótenshe jaǵdaılardy joıýǵa jergilikti atqarýshy organdardyń rezervinde 8 mlrd. teńge qarastyrylǵan
ASTANA. 11 qarasha. QazAqparat - Qys mezgilindegi tótenshe jaǵdaılardy joıýǵa jergilikti atqarýshy organdardyń rezervinde 8 mlrd. teńge kózdelgen. Bul týraly búgin Astanada QR Tótenshe jaǵdaılar vıtse-mınıstri Valerıı Petrov málim etti.
Aǵymdaǵy jyly mınıstrliktiń qutqarýshy bólimderi qys mezgilindegi tótenshe jaǵdaılarǵa ýaqytyly jáne tıimdi den qoıýy úshin 556 joǵary ótimdi tehnıkamen jaraqtaldy. "Zardap shekken adamdardy jedel izdeý, qutqarý, evakýatsııalaý jáne olarǵa shuǵyl medıtsınalyq kómek kórsetý maqsatynda "Salamatty Qazaqstan" baǵdarlamasy aıasynda bıyl 16 tikushaq satyp alynady. Zamanaýı medıtsınalyq tehnıkamen jabdyqtalǵan tikushaqtar elimizdiń oblystarynda qutqarý jumystaryn oryndaýǵa kezekshilikti júzege asyratyn bolady", - dedi V. Petrov.
Mınıstrlik málimeti boıynsha, elimizdiń respýblıkalyq joldarynda 12 kúrejoldyq medıtsınalyq-qutqarý pýnkti jumys isteıdi. Jyl sońyna deıin taǵy 14 pýnkt paıdalanýǵa berilmek. Olar respýblıkalyq avtojoldardyń apattyq qaýpi joǵary bólikterinde jol-kólik oqıǵalary kezinde aýyr jaraqat alǵan jábirlenýshilerdiń ómirine tez arada arasha túsýge arnalǵan.
QR TJM eldegi qazandyqtardyń daıyndyǵyna da tekseris júrgizýde. Qazaqstan boıynsha 850 jylý energetıkasy nysandaryna monıtorıng júrgiziledi.
Qar kóshkini bolatyn taýly aımaqtarda da apattyń aldyn alýǵa baǵyttalǵan ınjenerlik qurylǵylar ornatylýda.
"Aǵymdaǵy jyly "Qazgıdromet" boljamy boıynsha qys qatty bolady dep kútilýde. Soǵan oraı, mınıstrliktiń kúshteri men quraldaryn ázirlikke keltirý jáne paıdalaný jóninde jospar ázirlendi. Bul keshendi jumystar josparly túrde iske asyrylýda", - dedi vıtse-mınıstr.
