Qys qyzyqtary: Býrabaıdaǵy Laplandııaǵa saıahat
Qazaqstandyq Laplandııa nemese Santa klaýstyń rezıdentsııasy – qys qyzyǵyna toly demalys orny.
«Kelýshilerge Santa rezıdentsııasy boıynsha «Álemniń jeti keremeti» atty ekskýrsııa uıymdastyrylady. Ekskýrsııa barysynda tamashalaýshylardy elfter álemi men Santa klaýs kútedi. Aıtpaqshy, Santa klaýsqa tilek hatyn qaldyrýǵa bolady. Rezıdentsııa aýmaǵynda basqa da qyzyqtar bar. Mysaly, haskı jáne buǵyǵa jegilgen shanamen syrǵanaýǵa bolady. Sonymen qatar, jergilikti shaman bar, ol týrısterdi óz mekenimen tanystyryp, shaman dástúri týraly áńgimelep beredi. Odan bólek, ponıǵa minip jáne kvadrotsıkl tebý qarastyrylǵan. Qazaqstandyq Laplandııa jyl saıyn qarashanyń ortasynan bastap, keler jyldyń sáýirine deıin jumys isteıdi. Árıne, týrıster aǵyny jeltoqsanda kóp bolady, óıtkeni Jańa jyl merekesi ǵoı», - dedi qazaqstandyq Laplandııa kesheniniń ekskýrsııa jetekshisi Olıa Ýsenko BAQ ókilderine arnalǵan baspasóz týry barysynda.
Onyń aıtýynsha, munda maýsym kezinde shamamen 5 myń týrıst demalady.
«Otandyq týrısterden bólek, sheteldikter de keledi. Mysaly, Úndistan, Egıpet, tipti Laplandııanyń otany Fınlıandııadan arnaıy kelgen týrıster boldy. Olar qazaqstandyq Laplandııanyń qandaı aıyrmashylyǵy bar eken dep qyzyqtap kelgen. Aıtýlarynsha, bizdiń rezıdentsııa unady», - deıdi ol.
Aıta ketsek, atalǵan demalys ornynda ár qyzmetti jeke tańdaýǵa bolady. Máselen, Santa rezıdentsııasy adam basyna 2500 teńge turady (4 jasqa deıingi balalarǵa kirý tegin). Haskı men buǵy jegilgen shanamen serýendeý 2000 teńge, shamannyń qyzmeti 1000 teńge, kvadrotsıklmen serýendeý 1000 teńgeden bastalady.
Qazaqstandyq Laplandııa saǵat 11:00-den 19:30-ǵa deıin jumys isteıdi. Dúısenbi – demalys kúni.
«Aldyn ala nemese onlaın bılet alý múmkindigi qarastyrylmaǵan. Tek osy jerden ala alasyz. Qystan basqa mezgilde rezıdentsııa jumys istemeıdi. Kelýshiler demalys kúnderi jáne merekelerde jıileıdi», - dedi ekskýrsııa jetekshisi.
Baspasóz týry barysynda BAQ ókilderine Býrabaıdaǵy basqa da demalys nysandary tanystyryldy.
Aıta keteıik, Jańa jyl merekesi qarsańynda Astanadan Býrabaıǵa deıin arnaıy týrıstik elektr vagondary qatynaı bastady. Vagondar merekelik jáne ulttyq stılde bezendirilgen.
«Astana-Býrabaı» elektr poıyzy kún saıyn saǵat 6:03-te «Nurly jol» vokzalynan shyǵyp, kýrortty aımaqqa saǵat 9:57-de jetedi. Keri qaraı saǵat 19:15-te attanyp, Astana-1 stantsııasyna saǵat 22:18-de, al «Nurly jol» vokzalyna saǵat 23:00-de toqtaıdy.
Uıymdastyrýshylardyń aıtýynsha, merekelik bezendirilgen vagondardyń baǵasynda aıyrmashylyq joq. Búgin jolǵa shyqqan týrıstik poıyz 2023 jylǵy qańtardyń sońyna deıin júredi.
Eske sala keteıik, atalǵan jobany QR Prezıdentiniń Іs Basqarmasyna qarasty «Býrabaı Damý» JShS, «Kazakh Tourism» ulttyq kompanııasy jáne «Jolaýshylar tasymaly» AQ birlesip qolǵa alyp otyr. Maqsat – jolaýshylarǵa merekelik kóńil-kúı syılap, týrıster aǵynyn arttyrý.
