Qys kezinde respýblıkalyq avtojoldarda 575 ret kólik qozǵalysyna shekteý qoıyldy
ASTANA. 29 sáýir. QazAqparat - 2012 jylǵy qarasha aıynan 2013 jyldyń sáýiri aralyǵynda elimizdiń respýblıkalyq mańyzy bar avtojoldarynda 575 ret kólik qozǵalysyna shekteý qoıyldy. 2011-2012 jyldardaǵy sáıkes kezeńmen salystyrǵanda kórsetkish eki esege ósken. Tabıǵattyń tosyn syıy, ıaǵnı qardyń qalyń túsýi, boran, qatty aıaz jáne kóktaıǵaq Aqmola, Pavlodar, Qostanaı, Shyǵys Qazaqstan aýmaqtarynda jıi oryn aldy. Bul týraly «Qazaqavtojol» RMK-nyń baspasóz qyzmetinen habarlandy.
Atap aıtqanda, qozǵalysqa qoıylǵan shekteýlerdiń basym bóligi burqasyn boranǵa baılanysty - 388 ret, aýa temperatýrasynyń tómendeýinin - 55 márte, kóktaıǵaq saldarynan 54 ret jáne basqa da tabıǵı sebepterge oraı joldar jabyldy. Sońǵy ret jol qozǵalysyna shekteý 15 sáýirde Aqmola men Qostanaı oblystarynda tirkeldi.
«BAQ arqyly halyq nazaryna jol jaǵdaıy kúndelikti habarlandyrylyp, telearnalar arqyly jedel túsirilimder kórsetilip, jol jaǵdaılary jaıynda eskertýler jasalyp otyrdy. Sonymen qatar joldaǵy ahýal týraly aqparat Kólik jáne kommýnıkatsııa mınıstrligi men «Qazaqavtojol» RMK saıttarynda kúndelikti jarııalandy. Táýliktik ortalyq aqparattandyrý telefony da úzdiksiz jumysyn júrgizdi. Qońyraý shalýshylardyń arasynda kóbinese boran bastalmaı jatyp jolǵa shyǵyp, ortasynda qozǵalyssyz qalyp qoıǵan jaǵdaılar jıi kezdesti. Bundaı jolaýshylarǵa tıisti kómek sharalary kórsetilip otyrdy»,-delingen bul málimetterde.
Buǵan qosa sý tasqynyn aldyn alý sharalaryna «Qazaqavtojol» RMK daıyndyǵy úzdiksiz júrgizildi. Aýa raıy temperatýrasynyń kúrt kóterilý saldarynan qar erip, tasqyn sýlardyń joldy shaıyp ketý qaýpine baılanysty shekteýler Aqtóbe men Shyǵys Qazaqstan oblystarynda engizildi.
