Qys kezinde balyqshylar asa saq bolǵany jón: Túrkistan oblystyq TJD eskertý jasady
Jalpy, sońǵy 5 jylda Túrkistan oblysy aýmaǵynda 12 adam balyq aýlaý kezinde sýǵa batyp, qaıtys bolǵan. 2018 jyly 7-adam, 2019 jyly 2-adam, 2020 jyly 2-adam, al bıylǵy jyly balyq aýlaýǵa shyqqan bir adam qaıtyp oralmaǵan. Al, bıylǵy jyly el boıynsha balyq aýlaý kezinde qaýipsizdik erejelerin saqtamaǵan 14 adam sýǵa batyp ketken.
Bul týraly Túrkistan oblysy Tótenshe jaǵdaılar departamenti Azamattyq qorǵanys basqarmasynyń bastyǵy Qanat Qarabalaev málimdedi.
«Balyq aýlaý demalystyń keremet túri, alaıda qaýipsizdik erejelerin saqtamasa ol óte qaýipti. Kún salqyndaǵan sátti kúzgi jáne qysqy balyq aýlaýdy unatatyndar, onyń ishinde sý aıdyndaryndaǵy muzda balyq aýlaýshylar kóbeıe túsedi. Sondyqtan oblysta qys mezgilinde sý aıdyndarynda adamdardyń qaýipsizdigi eń ózekti máselelerdiń biri bolady. Osy baǵytta, Túrkistan oblysy Tótenshe jaǵdaılar departamenti jáne onyń aýmaqtyq bólimsheleri quzyrly mekemelermen birlesip, turaqty profılaktıkalyq is-sharalar júrgizip keledi. Oblys turǵyndary men qonaqtaryna balyq aýlaý kezindegi qaýipsizdik erejelerin qatań saqtaýdy suraımyz» - dedi Qanat Qarabalaev.
