Qys bastalǵaly kóligi buzylyp, qar qursaýynda qalǵan 506 jolaýshy qutqaryldy
ASTANA. QazAqparat - Tasjolda qysqy kútip ustaý jumysy bastalǵannan beri jolshylar 500-den astam adamǵa kómek kórsetti. Onyń qatarynda shetel azamattary da bar, dep habarlaıdy QazAqparat.
Qazan aıynan beri respýblıkalyq mańyzdaǵy avtojoldarda qozǵalys 150 retten astam shekteldi.
Osy ýaqyt aralyǵynda jolshylar 200-den astam kólikti jyly boksqa ornalastyryp, 506 adamdy jylytý pýnktine jetkizdi.
Qysqy kútip ustaý jumystary aıasynda jol qyzmetteri kúsheıtilgen rejımge aýystyryldy.
Jeltoqsannyń 21-inen 22-sine qaraǵan túni jolshylar respýblıkalyq mańyzdaǵy tasjoldarǵa 1050 tekshe metr qum-tuz qospasyn seýip, óńdedi.
Respýblıkalyq mańyzy bar avtojoldar ashyq. Qazir 200-den astam tehnıka jumysyn jalǵastyryp jatyr.
Aıta ketý qajet, qar qursaýynda qalyp qoıatyndardyń qatarynda daýyldy eskertý men joldyń jabylǵanyn elemeı alys saparǵa shyǵyp ketetinder az emes.
Atalmysh habarlamalardy eskerip, aýa raıy boljamyn jiti qadaǵalaǵan abzal.
Al tasjoldarda shtattan tys jaǵdaı týyndasa turǵyndar 1403 baılanys ortalyǵyna habarlasa alady.
Máselen, ótken túnde baılanys ortalyǵynyń operatorlary 2 myńǵa jýyq qońyraýǵa jaýap berdi.
