Qys bastalǵaly beri qar qursaýynda qalǵan 8 myń jolaýshyǵa kómek kórsetilgen
25 myń shaqyrym respýblıkalyq mańyzy bar avtomobıl jolyna qysqy kútip ustaý jumysy júrgizilýde. Bul jumystarǵa 1400-den astam qar tazalaý tehnıkasy jumyldyrylǵan. Dese de, respýblıkalyq joldarda áli de tehnıka jetispeýshiligi baıqalady. Mamandardyń aıtýynsha, máseleni sheshý úshin 400-ge jýyq arnaıy tehnıka qajet. Sonyń 141 birligin bıyl satyp alyp, birden tasjoldarǵa jiberý kózdelgen.
Qazirgi ýaqytta kóktaıǵaqpen kúresý sharalary aıryqsha kúsheıtildi. Ol úshin elimizde 507 óndiristik baza jumys istep jatyr. Barlyq qoımalarda qajetti materıaldar ázirlengen. Atap aıtqanda, 67 myń m3 qum, 21 myń tonna tuz ben 55 tys. m3 untaq saqadaı saı.
Aıta keteıik, rekonstrýktsııalaý jáne jóndeý aıasynda qalyń qar basý qaýipi joǵary ýchaskelerdiń uzyndyǵy 2,5 myń shaqyrymǵa deıin qysqartyldy. Osyǵan deıin 3,5 myń shaqyrymdy quraǵan bolatyn. 419 shaqyrymǵa statsıonarlyq qar ustaıtyn qorshaýlar qoıyldy. Budan bólek, 43 myń metrge qardan qorǵaıtyn qalqandar ornatyldy. Atalǵan ýchaskelerge jaýapty qyzmetkerler men qajetti tehnıka da bekitilip otyr.
Respýblıkalyq mańyzy bar joldarda «taıǵaq jol», «maksımaldy jyldamdyqty shekteý» sııaqty ýaqytsha 4 461 jol belgisi qoıylǵan.
Qaýipsiz jáne úzdiksiz jol qozǵalysyn qamtamasyz etý maqsatynda aýa-raıyna baılanysty 400-ge jýyq tehnıka jáne 600-den astam adam jumyldyrylǵan.
Jolshylar táýlik boıy patrýldeýmen júıeli túrde aınalysady. Jyl saıyn qys mezgilinde jolda qıyn jaǵdaıǵa tap bolǵan myńdaǵan júrgizýshige jol qyzmetkerleri birinshi bolyp kómekke keledi. Máselen, bıyl qys mezgili bastalǵannan beri jolshylar qar qursaýynan 4 myńǵa jýyq kólik quralyn shyǵardy, 8 myńnan astam jolaýshyǵa kómek kórsetti.
Aıta keteıik, elimizde 120 jylytý pýnkti bar. Olar borandy, sýyq kúnderi kóligi synyp, júrmeı qalǵan kezde jolaýshylardy ýaqytsha ornalastyrýǵa arnalǵan. Bul beketterde jol paıdalanýshylary úshin tamaqtanyp, jylynyp, jýynýy úshin barlyq jaǵdaılar qarastyrylǵan. Al júrgizýshiler temir tulparlaryn jyly boksterge qoıyp, jóndeı alady.
Barlyq qyzmetterdiń birlesken sharalaryn qabyldaý ýaqytyn kórsete otyryp, qolaısyz aýa raıy jaǵdaılaryna baılanysty qozǵalysty shekteý kezinde ózara is-qımyl algorıtmi bekitildi.
Shtattan tys jaǵdaılar jedel áreket etý úshin paıdalanýshylardyń qatysýymen «Whatsapp», «Telegramm» sııaqty tanymal messendjerlerde arnaıy toptar quryldy.
Sonymen qatar, jol paıdalanýshylary 1403 nómiri boıynsha «Qazavtojol» UQ» AQ dıspetcherlik qyzmetine júgingen jaǵdaıda, kólik quraldaryna dereý kómek kórsetilýde.
