Qys aıynyń alǵashqy kúnderi kún jyly bolady
ASTANA. QazAqparat - 1-3 jeltoqsan aralyǵynda elimizdiń basym bóliginde kún jyly bolady, dep habarlaıdy «Qazgıdromet» RMK.
Kúntizbe boıynsha qystyń alǵashqy aıy kelip jetse de, kúzdiń jylýy áli qaıta qoıǵan joq. Demalys kúnderi aýa temperatýrasy Qazaqstan aýmaǵynda klımattyq normadan 3-8º, atap aıtqanda, soltústik jáne shyǵys oblystarda 9-13º joǵary boldy. Respýblıka aýmaǵynyń kóptegen bóliginde aýa raıyn aıqyndaıtyn antıtsıklon jaqyn aradaǵy úsh táýlikte aqyryndap shyǵysqa qaraı aýysady.
Onyń sońynan Povoljıa aýdandarynan jáne Kaspıı teńiziniń ońtústiginen atmosferalyq fronttary bar tsıklondar kele bastaıdy. Olar batys aýdandarda jáne odan ári ońtústik, ortalyq jáne soltústikte jańbyr, qar, kóktaıǵaq týdyrady.
Aýa temperatýrasy anaǵurlym tómendeıdi, biraq normadan 2-7º joǵary saqtalady.
