«Qys-2019» respýblıkalyq komandalyq-shtabtyq oqý-jattyǵýy ótti
KÓKShETAÝ. QazAqparat - Aqmola oblysynda «Qys-2019» respýblıkalyq komandalyq-shtabtyq oqý-jattyǵýy ótti, dep habarlaıdy QazAqparat tilshisi oblystyq TJD baspasóz qyzmetine silteme jasap.
Shara barysynda qutqarýshylar qar qursaýynan zardap shekkenderdi qutqarý daǵdylaryn pysyqtady. Arnaıy qyzmettiń qyzmetkerleri de kásibı sheberlikter shyńdady.
Oqý-jattyǵý stsenarıı boıynsha kommýnaldyq qyzmetter Zerendi aýdanyndaǵy qazandyqta jarylys bolyp, eki adam zardap shekken tótenshe jaǵdaıdyń saldaryn joıýǵa qatysty.
Órt sóndirýshiler tilsiz jaýdy aýyzdyqtasa, dárigerler zardap shekkenderge jedel medıtsınalyq kómek kórsetti. Bul jattyǵýlar shynaıy TJ kezinde qyzmetter óz is-qımyldaryn qalaı iske asyratynyn kórsetti. Oqý-jattyǵý is júzinde oıdaǵydaı ótti.
Budan keıin qutqarýshylar juqa muz astyna ketken balyqshylarǵa kómekke umtyldy. Zardap shekkenderdi qutqaryldy, alǵashqy medıtsınalyq kómek kórsetilip, jylytý bekitinine jetkizildi.
Al, Kókshetaý qalasynda qutqarýshylar men shuǵyl qyzmetter jol-kólik oqıǵasy kezinde «hlor» ýly zatyn tógilgen jaǵdaıda, adamdardy qutqarý boıynsha oqý-jattyǵýyn ótkizdi.
«Búgin biz azamattyq qorǵanystyń memlekettik júıesin qys maýsymynda oryn alatyn TJ daıyndyǵyn tekserdik. Oqý-jattyǵýǵa jeke quramnan 100 adam men 30 arnaıy tehnıka tartyldy», - dedi Aqmola oblysy TJD bastyǵynyń orynbasary Qanat Dospaev.
Aıta ketý kerek, búgin tańda oblysta tirshilikti qamtamasyz etý nysandary qysqy maýsymǵa daıyn. Jylytý maýsymy shtattyq rejımde ótýde. Qajetti normada otyn qory bar. Avtomobıl joldarynyń qar qursaýyna ushyraýy qaýpi bar aýmaqtar anyqtalyp, olarǵa 239 jylytý pýnkti belgilengen. Avtomobıl joldary men temirjoldardaǵy úzdiksiz qozǵalysty qamtamasyz etý úshin 25 jol uıymy, 900-den astam arnaıy tehnıka jumyldyrylyr otyr. Kóktaıǵaqqa qarsy materıaldar qory jáne qar toqtatatyn qurylǵylar daıyndaldy.
