Qyrymbek Kósherbaevqa «Batys Qazaqstan oblysynyń Qurmetti azamaty» ataǵy tabys etildi
«Qyrymbek Eleýuly Batys Qazaqstan oblysynda ákim qyzmetin 2000-2003 jyldary atqardy. Osy jyldar ishinde júzege asqan ıgilikti ister jaıynda batys jurty saǵynyshpen aıtqanyna kýámiz. Qashanda Aqjaıyq jurtynyń Qyrymbek Eleýulyna degen ystyq yqylasy erekshe», - dedi Batys Qazaqstan oblysy ákiminiń orynbasary Ǵ. Ospanqulov.
Sol bir kezeńde Qyrymbek Eleýuly Aqjaıyq óńirine ınvestorlar tartý, óńirdiń ınfraqurylymyn damytý, áleýmettik jaǵdaıyn kóterý, oblys ortalyǵynan bastap, alys-jaqyn eldi mekenderdiń jolyn jańartý, gazben qamtamasyz etý jumystaryn aıaqtaý sııaqty kúrdeli isterdi atqarýǵa uıytqy boldy. Úsh jylda árbir aýylǵa deıin gaz tartylyp, jergilikti turǵyndar sol ıgilikti istiń sharapatyn búgingi kúnge deıin kórip keledi .
Osy oraıda Batys Qazaqstan oblysynyń ákimi Altaı Kólginov quttyqtaý hat joldaǵan. Onda «Oblystyń «Qurmetti azamaty» atanýyńyz - óńirimizde qalǵan «Kósherbaev qoltańbasynyń» qoǵamdyq moıyndalýy. Jańa myńjyldyqtyń bas kezinde Oral óńiriniń gúldenýine qosqan úlesińiz úshin Sizge óńir turǵyndarynyń atynan alǵys bildiremin!» - dep jazylǵan.
Batys Qazaqstan oblysy ardagerler keńesiniń tóraǵasy Abat Esenǵalıev sol jyldary Bókeı ordasy tarıhı kesheni, táýelsizdik tarıhynda jańadan teatr ǵımaratyn salý isinde Qyrymbek Kósherbaev zor eńbek sińirgenin atap ótti. Pedagogıkalyq ınstıtýtqa Mahambettiń, aýylsharýashylyǵy ınstıtýtyna Jáńgir hannyń esimderiniń berilýine uıytqy boldy.
Óz kezeginde, aımaq basshysy Qyrymbek Kósherbaev Batys Qazaqstan oblysynyń azamattaryna kórsetken qurmet pen jumysyna bergen baǵa úshin alǵysyn bildirdi.
