Qyrymbek Kósherbaev jemqorlyqpen kúres jónindegi komıssııasynyń otyrysyn ótkizdi
Memlekettik hatshy Qyrymbek Kósherbaevtyń tóraǵalyǵymen Qazaqstan Respýblıkasy Prezıdenti janyndaǵy Sybaılas jemqorlyqqa qarsy is-qımyl máseleleri jónindegi komıssııasynyń kezekti otyrysy ótti. Jıynda taýarlardy, jumystardy jáne qyzmetterdi memlekettik satyp alý kezindegi sybaılas jemqorlyqqa qarsy is-qımyl jóninde qabyldanǵan sharalardyń qazirgi ahýaly talqylandy.
Komıssııa tóraǵasy memlekettik satyp alýlardyń tıimdi jumys isteýi áleýmettik-ekonomıkalyq máselelerdi sheshýge, otandyq salalardy damytýǵa jáne ulttyq taýar óndirýshilerdiń ónimderin qoldaýǵa yqpal etetinin atap ótti. Sonymen qatar atalǵan salada sybaılas jemqorlyq táýekelderi joǵary ekeni, mundaı jaǵdaı rásimdik jáne qarjylyq tártip buzýshylyqtar, bıýdjet qarajatyn urlaý jáne ózge de teris maqsattaǵy is-áreketter kezinde oryn alatyny aıtyldy.
Otyrys barysynda Qazaqstannyń Tuńǵysh Prezıdenti – Elbasy N.Á.Nazarbaev memlekettik satyp alýlardyń ashyqtyǵyn qamtamasyz etý, sybaılas jemqorlyqqa qarsy kúresti kúsheıtý maqsatynda bul jumystardy elektrondyq tásilmen ótkizýdi qoldaǵany jaıynda baıandaldy. Qabyldanyp jatqan sharalar bıýdjet qarajatyn paıdalanýdyń tıimdiligin arttyrýǵa, áleýetti ónim berýshilerdiń satyp alýlarǵa qatysý rásimin ońaılandyrýǵa, qujattardyń elektrondyq depozıtarııin engizýge múmkindik beredi.
Sondaı-aq bıyl Memleket basshysy Q.K.Toqaevtyń tikeleı tapsyrmasymen «Kvazımemlekettik sektordyń jekelegen sýbektileriniń satyp alý týraly» Zańy qabyldandy. Prezıdenttiń otandyq bıznestiń satyp alýlarǵa tolyqqandy qoljetimdiligin qamtamasyz etýge, bir kózden satyp alýdy qysqartýǵa, olardyń tıimdiligi men ashyqtyǵyn arttyrýǵa qatysty zańnamany jetildirý jónindegi tapsyrmalary oryndalyp jatyr.
Sybaılas jemqorlyqqa qarsy is-qımyl jáne Qarjylyq monıtorıng agenttikteriniń, Bas prokýratýranyń, «Atameken» UKP, Qarjy, Densaýlyq saqtaý mınıstrlikteriniń basshylary, sondaı-aq, birqatar óńirlerdiń ákimderi satyp alý kezindegi sybaılas jemqorlyq pen basqa da tártip buzýshylyqtardy ashý jáne joıý, kináli azamattardy zańnamada belgilengen jaýapkershilikke tartý jóninde qabyldanǵan sharalar týraly baıandady. Bul rette mundaı quqyq buzýshylyqtardyń basym bóligi qurylys, turǵyn úı-kommýnaldyq sharýashylyǵy, bilim berý, densaýlyq saqtaý jáne mádenıet salalarynda bolatyny, al urlanǵan bıýdjet qarajaty kóleńkeli aınalymǵa túsetini týraly aıtyldy.
Jıynda Prezıdenttiń kómekshisi – Qaýipsizdik Keńesiniń hatshysy Á.Isekeshev memlekettik satyp alý kezinde sybaılas jemqorlyq táýekelderin tómendetý jónindegi usynystaryn ortaǵa saldy.
Sonymen qatar komıssııada kásipkerlik sýbektileriniń quqyqtary men zańdy múddelerin saqtaý úshin atqarylyp jatqan jumystar, satyp alý baǵalaryn asyra kóterý, tólengen salyqtar týraly málimetterdi qubyltý, memlekettik satyp alý portalynyń tıisti deńgeıde qyzmet atqarmaýy, kináli adamdardyń óz dárejesinde jaýapqa tartylmaýy sekildi máselelerdi qarastyrdy.
Komıssııa otyrysynyń qorytyndysy boıynsha Memlekettik hatshy birqatar naqty tapsyrma berip, olardyń oryndalýy baqylaýda bolatynyn aıtty. Qarjy mınıstrligine Komıssııanyń memlekettik satyp alý salasyndaǵy memlekettik retteýdi qamtamasyz etetin usynymyn ázirleý tapsyryldy.
