Qyrymbek Kósherbaev Jastar ortalyǵynda boldy
QYZYLORDA. QazAqparat - Oblys ákimi Qyrymbek Kósherbaev «Jastar resýrstyq ortalyǵy» KMM-de bolyp, jyl basynan beri atqarylǵan jumyspen tanysty, dep habarlady QazAqparat tilshisi ákimniń baspasóz qyzmetine silteme jasap.
Kovorkıng ortalyǵynda aımaq basshysynyń nazaryna birqatar joba usynyldy. Olardyń qatarynda otbasy mádenıetin artyrýǵa baǵyttalǵan «Aq otaý» ınttelektýaldy mektebi, IT mamandary arasynda VR, AR tehnologııalaryn damytý jáne nasıhattaýǵa arnalǵan «Arman qala », «Jeruıyq» rýhanı jańǵyrý kesheni, «Kıber-juma», «Bıznes-start» sııaqty bastamalar bar.
«Bıznes-start» ınnovatsııalyq jobasynyń avtory - Qorqyt ata atyndaǵy Qyzylorda memlekettik ýnıversıtetiniń jas ǵalymdary. Ýnıversıtettiń esepteý tehnıkasy jáne aqparattyq júıeler kafedrasynyń meńgerýshisi, PhD doktory Sábıt Ibadýlla qazir 3D prınterde Syrdarııa ózeniniń sol jaǵalaýynda salynatyn shaǵyn aýdannyń bas jospary jasalyp jatqanyn jetkizdi.
Odan keıin 9 aıdaǵy is-sharalar jóninde ortalyq dırektory Jasulan Aldabergenov aıtyp berdi. Bıyl oblystyq bıýdjetten ortalyqqa 76 mln 334 myń teńge bólindi. Bul aldyńǵy jylmen salystyrǵanda 12 paıyzǵa artyq. Munda 40-tan astam adam eńbekpen qamtylǵan. Ǵımarat bastan-aıaq jóndelip, jastarmen jumys isteý tásilderiniń jańa úlgisi qalyptasty.
«Nıet bildirgender kovorkıng, IT ortalyqtary, sporttyq oıyn alańdary, sporttyq sektsııalar men psıholog, zańger qyzmetin tegin paıdalana alady. Aǵylshyn tilin úırenip, kompıýterlik saýattylyqty, beıneoperatorlyq biliktilikti arttyrýǵa da múmkindik bar. Ortalyqtyń qyzmetine kún saıyn shamamen 50 shaqty jas júginedi», - deıdi «Jastar resýrstyq ortalyǵynyń» dırektory Jasulan Aldabergenov.
Osyǵan deıin ártúrli máselemen kelgen 3 700-den astam adamǵa keńes berilse, 9 bos jumys oryndary jármeńkesinde 250-deı astam adam jumysqa ornalasty.
Reseıdiń Máskeý, Sankt-Peterbýrg qalalarynda bilim alyp jatqan jerlesterimizdi jumyspen qamtý sharalary jóninde oblystyq jastar saıasaty máseleleri basqarmasynyń basshysy Erkebulan Meńlibaev baıandady. Belgili bolǵandaı, kelesi jyly bitiretin jastardyń qamy úshin búginde jergilikti 11 kásiporyn-mekememen kelisim jasaldy. Osy oraıda oblys ákimi Q.Kósherbaev Reseıde oqıtyn syrboıylyq stýdentterdiń qaýymdastyǵyn qurý qajettigin atap ótti.
