Qyrymbek Kósherbaev UOS ardagerin mereıtoıymen quttyqtady
Bul týraly oblystyq ákimdiktiń baspasóz qyzmetinen habarlady.
Ol medıtsınalyq tehnıkýmdi bitirisimen 1941 jyly soǵysqa attandy. Oq pen ottyń ortasynda júrip, Keńes jaýyngerleriniń aman qalýyna zor eńbek sińirdi. «Batyr qala» Máskeýdi qorǵaýǵa, Kenıngsberg qalasyn, Belorýssııany, Polshany bosatýǵa qatysyp, Berlındi alýda erlik kórsetti. Otan aldynda jasaǵan adal qyzmeti men tanytqan batyrlyǵy úshin 2 márte «Qyzyl juldyz» ordenimen, «Jaýyngerlik erligi úshin» («Za boevye zaslýgı») medalymen, ekinshi dárejeli «Uly Otan Soǵysy» ordenimen marapattaldy.
Soǵystan keıin, 15 jyl boıy Lıtvanyń, Túrkimenstannyń Memlekettik qaýipsizdik áskerı bólimderinde qyzmet etip, medıtsına salasyndaǵy qyzmetin shekara qyzmetimen ushtastyrdy. Qaıyrymdylyq pen meıirimdiliktiń shyńy sanalatyn «Qyzyl krest jáne qyzyl jarty-aı» qoǵamynda qyzmet etti. 1964 jyly áskerı qyzmetten demalysqa shyǵyp, oblystyń densaýlyq saqtaý salasynyń órkendeýine úlesin qosty. Densaýlyq saqtaý salasynyń kásipodaǵyn 20 jyl basqaryp, bul salada da eren eńbektiń úlgisin tanytty. 1966 jyly Keńesbaı Smaǵululynyń bastamasymen medıtsına qyzmetkerleriniń densaýlyǵy tekserilip, dárigerler arasynda salaýattylyqty nasıhattaý maqsatyndaǵy Spartakıada jalaýy birinshi ret kóterildi. Keıin bul bastama jalǵasyn taýyp, dástúrli túrde ótkizilýde. Bıyl sol dástúrli Spartakıadanyń 50 jyldyǵyn medıtsına qaýymy saltanatty túrde atap ótti.
Keńesbaı Smaǵululy - qajyrly eńbegi úshin QR Prezıdentiniń Alǵys hatymen, «Eren eńbegi úshin» medalimen marapattaldy. Qyzylorda qalasynyń qurmetti azamaty. 2005 jyldan bastap Qyzylorda medıtsına kolledjinde úzdik stýdentke Keńesbaı Qalıev atyndaǵy shákirtaqy berilip keledi.
- Úlken qoǵamda da, shaǵyn ortada da óziniń bitim - bolmysymen, minezi, aqyl-parasatymen ultynyń bar jaqsy qasıetin kórsetip turatyn tulǵalar bolady. Mine, sol tulǵalardyń biri jáne biregeıi búgingi mereıtoı ıesi Keńesbaı Smaǵululy degen pikirmen aǵamyzdy biletin árbir azamat kelisedi dep oılaımyn- degen aımaq basshysy Keńesbaı aqsaqaldy oblys ákiminiń alǵys hatymen jáne «Eńbek ardageri» medalimen marapattady.
