Qyrymbek Kósherbaev: Ulttyq dástúrlerdi el birligine paıdalaný kerek
«Biz aýdandardyń da, qalalardyń ákimderin saıası qyzmetker mártebesine qaıtyp ákeldik. Qoǵamdyq sanany jańǵyrtý – úlken rýhanı, saıası másele. Ákimder óńirlerdegi saıası, áleýmettik-ekonomıkalyq damýyna jaýapty. Saıası jetekshilik jasaısyzdar. Aıta keteıin, Memleket basshysynyń bizge jaqynda bergen tapsyrmasyna sáıkes, ulttyq ıdeologııa máselelerin odan ary jetildirý boıynsha ózimizdiń usynystarymyzdy daıyndap jatyrmyz. Bul ortaq ári úlken jumys. Qazir ekonomıkalyq ta, rýhanı da, saıası da máseleler birdeı qatar júrýi kerek. Ol týraly Memleket basshysy Qasym-Jomart Toqaev halyqqa arnaǵan Joldaýynda naqty aıtyp kórsetti», - dedi Memlekettik hatshy.
Qyrymbek Kósherbaev mınıstrler men ákimder osy jumystyń aldynda júrýi kerektigin eske saldy.
«Munda baǵdarlama sheńberinde keleńsiz kórinisterdi shekteý týraly pikirler aıtyldy. Alaıda quqyqtyq memleket qaǵıdaty sheńberinde bul jaıttardy shekteý qanshalyqty nátıje beretinin saraptaýymyz kerek. Búgingi tańdaǵy toı - ulttyq salt-dástúrdiń saltanat quratyn, urpaq ulaǵat alatyn, óner, mádenıet, tárbıe kóretin ónegeli sharalar bolsa deımiz. Biz Naýryz merekesiniń qarsańynda turmyz ǵoı. Batysta kórisý degen jaqsy dástúr bar. Onda qystygúni eshkim eshqaıda qatynaı almaıdy ǵoı. Qar erı bastaǵannan keıin jer qaraıǵanda jastar jınalyp, aqsaqaldardyń batasyn alady. Osy sebepti 14 naýryzǵa taıaý Amal merekesin keńinen atap, 22-24 naýryzda Naýryz merekesin toılaýǵa baılanysty biz de ózimizdiń usynysymyzdy beremiz. Ulttyq dástúrlerimizdi eldiń basyn biriktirýge durys paıdalanýymyz kerek», - dedi ol.
Eske sala ketsek, Memlekettik hatshy Qyrymbek Kósherbaevtyń tóraǵalymen Aqordada búgin QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komıssııanyń otyrysy ótkizildi.
