Qyrymbek Kósherbaev Syrdarııanyń sol jaǵalaýyndaǵy qala qurylysymen tanysty
QYZYLORDA. QazAqparat - Qyzylorda oblysynyń ákimi Qyrymbek Kósherbaev Syrdarııa ózeniniń sol jaǵalaýynda salynyp jatqan jańa qala aýdanynyń qurylys barysymen tanysyp, merdiger mekeme basshylarymen kezdesti, dep habarlady QazAqparat tilshisi.
Qazirgi tańda jaǵalaýdyń arǵy betinen boı kóterip jatqan nysandardyń jumysy qalypty júrgizilýde. Qurylysy bıyl bastalǵan ǵımarattar qazirdiń ózinde eńse tiktep, tipti birqatary bitýge taıaǵan. Negizinen bólingen 1532 gektar aýmaqtyń úshten birinde josparǵa saı jumystar júrgizilip jatyr.
Atap aıtsaq, 500 gektar aýmaqqa ornalasýy tıis 18 kópqabatty úı men 320 oryndyq balabaqsha, burynǵy Qazaq ortalyq atqarý komıteti ǵımaraty negizindegi mýzeı jáne «Bolashaq» ýnıversıtetiniń ǵımarattary salynyp jatyr. Sonymen qatar, onkologııalyq ortalyq, oblystyq aýrýhana men 600 oryndyq mekteptiń joba-smetalyq qujattary ázirlený ústinde.
Memlekettik-jekemenshik áriptestik negizinde salynyp jatqan nysandardy aralap kórgen aımaq basshysy aldymen balabaqsha qurylysyn kórdi. Búginde bóbekjaıdy salý jumystarynyń 80 paıyzǵa jýyǵy aıaqtalǵan. Endi jylý jáne qajetti qural-jabdyqtarmen qamtamasyz etý ǵana qalyp tur. Keler jyly qoldanysqa berý kózdelýde.
Jańa qalany salý tek qurylys júrgizýmen ǵana bitpeıtini belgili. Oǵan jylý, aýyzsý, elektr energııasyn tartý qajettigi taǵy bar. Osy maqsatta sol jaǵalaýdan jańa elektr taratý toraby salynýda. Jaryq taratý stantsııasy jabyq ǵımaratta ornalasady. «Qyzylorda elektr taratý toraptary kompanııasy» AQ basqarma tóraǵasy Muhıtjan Kárimbaevtyń aıtýynsha, stantsııa sońǵy úlgide jabdyqtalmaq.
«Bul sol jaǵalaýdy qajetti qýatpen qamtamasyz ete alatyn elektr toraby bolmaq. Eki jylda bitýi qajet bul jobaǵa 1 mlrd 600 mln teńge qaralǵan. Bıyl 680 mln teńgeni ıgerdik. Qazirgi tańda negizgi jabdyqtar ákelindi. Sonymen qatar, qosymsha qurylǵylardy Eýropa elderinen aldyramyz. Keler jyly iske qosamyz dep otyrmyz. Bir ereksheligi - elektr taratý qurylǵylary ǵımarat ishinde ornalasady. Jabyq kúıde bolǵany jaýyn-shashynnan qorǵap, qaýipsizdikti qamtamasyz etedi», - deıdi ol.
Sonymen qatar, sý tartý máselesi de qolǵa alynǵan. Búginde oń jaǵalaýdan darııa astymen sý tartylyp, ol jumystar jalǵasyn tabýda. Odan bólek qubyr júrgizý men gaz tartý máselesi de qolǵa alyndy. Endi atalǵan aýqymdy sharýalardy aldaǵy jyly aıaqtaý mindeti tur.
