Qyrymbek Kósherbaev slavıan etnosynyń belsendi ókilderin marapattady
QYZYLORDA. QazAqparat- Qyzylorda oblysynda slavıan ulysynyń 15 myńnan astam ókili turady. Olardyń deni elimizdiń ósip-órkendeýine óz úlesin qosyp kele jatqan «Slavıane» qoǵamdyq mádenı birlestiginiń belsendi músheleri bolyp tabylady. 20 qańtar kúni oblys ákimi Qyrymbek Kósherbaevtyń qatysýymen qoǵamdyq birlestiktiń 20 jyldyq merekesi atalyp ótti, dep habarlady QazAqparat tilshisi.
Merekelik sharaǵa oblystyq Qazaqstan halqy Assambleıasynyń músheleri, QR Parlamenti Májilisiniń depýtaty Natalıa Jumadildaeva, Reseı Federatsııasynyń Qazaqstan Respýblıkasyndaǵy Elshiliginiń keńesshi ýákili Aleksandr Mýsıenko, Reseılik otandastardyń Qazaqstan Respýblıkasyndaǵy úılestirý keńesiniń tóraǵasy Vsevolod Lýkashov, birlestiktiń ardagerleri men jastary, ózge de etnomádenı birlestik ókilderi, qatysty.
Saltanatty merekede birlestiktiń belsendi músheleri oblys ákiminiń Alǵys hattarymen marapattaldy. Sondaı-aq sharada Májilis depýtaty Natalıa Jumadildaeva, Reseıdiń Qazaqstandaǵy Elshiliginiń keńesshi ýákili Aleksandr Mýsıenko, Reseılik otandastardyń Qazaqstandaǵy úılestirý keńesiniń tóraǵasy Vsevolod Lýkashov quttyqtaý sóz sóılep, birlestik ókilderine Qurmet gramotalaryn tabystady.
Aıta ketý kerek, «Slavıane» qoǵamdyq mádenı ortalyǵy 1997 jyldyń 16 shildesinde quryldy. Osydan 20 jyl buryn shańyraq kótergen birlestik atalǵan jyldar ishinde elimizdiń ósip-órkendeýine óz úlesin qosyp keledi. Birlestiktiń alǵashqy tóraıymy Lıtvınova Nellı Trofımovna bolatyn. 1998 jyldan bastap Şerbakova Galına Sergeevna basqaryp, ortalyqty jumysyn júıeledi.
Búgingi kúni Syr elinde slavıan ulysynyń 15571 ókili bar. Olardyń belsendileri únemi bas qosyp, mádenı salt-dástúrdi jańǵyrtýǵa atsalysyp, babadan qalǵan baı muralaryn saqtap qalýǵa baryn salyp keledi.
Birlestiktiń músheleri ártúrli salada ter tógip, el damýy jolynda eńbek etýde. Bastysy, olar birlik pen beıbit kúnderdiń qadirin tereń uǵynǵan. Sondyqtan da yntymaqtyń uıytqysy bolǵan oblystyq Qazaqstan halqy Assambleıasyna olardyń alǵysy sheksiz.
Merekelik kesh aıasynda Aqtóbe, Shymkent qalalarynan kelgen qonaqtar jınalǵan jurtshylyqqa ásem ánin tartý etti. Slavıan halqynyń ulttyq bıi men ánderi oryndalyp, Syr ónerpazdary merekege oraı óz ónerlerin ortaǵa saldy.
