Qyrymbek Kósherbaev pen Islam Ábishov Syrdarııanyń sý tasqyny yqtımal aýmaqtaryn tekserdi
QYZYLORDA. QazAqparat-Qyzylorda oblysynyń ákimi Qyrymbek Kósherbaev pen Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishev Jańaqorǵan, Shıeli, Syrdarııa, Jalaǵash jáne Qarmaqshy aýdandaryn aralap, Syrdarııa ózeni jaǵalaýynyń sý tasqyny qaýpi tónip turǵan aýmaqtaryn tikushaqpen baqylady, dep habarlady QazAqpart HAA tilshisi oblystyq ákimdikke silteme jasap.
Jaýapty mekeme basshylarymen birge olar Shıeli aýdanyndaǵy úrlemeli tospany, Syrdarııa aýdanyndaǵy jańa kópirdi kórip, Qarmaqshy aýdany Jańajol aýyldyq okrýginiń aýmaǵyndaǵy atqarylyp jatqan jumys barysymen tanysty.
- Bıylǵy jyly qańtar men sáýir aılaryn qosa eseptegende Shardara sý qoımasyna 13 mlrd. tekshe metr sý keldi. Dál osyndaı úlken mólsherdegi sý Syrdarııa ózeninde sońǵy ret 1969 jyly bolǵan. 2-16 mamyr aralyǵynda jaýyn-shashyn mol bolady dep boljanýda. Demek, sonyń áserinen sýdyń kólemi taǵy da ulǵaıýy múmkin. Onyń ústine Qarataýdyń basyndaǵy qar áli erı qoıǵan joq. Ózen arnalarynyń barlyq qaýipti tustaryna jaýapty tulǵalar qoıylyp, kezekshilik ornatyldy. Onymen qosa turǵyndardyń ózderi de aýyzbirshilik tanytyp, jaǵalaý aýmaǵyna nyǵaıtý jumystaryn júrgizýde. Eger ózen arnasy taǵy da kóteriletindeı jaǵdaı týyndasa asa iri kólemdegi sýdy bosatý týraly kórshiles Ózbekstan memleketimen kelissózder júrgizip jatyrmyz,- dedi Islam Ábishev.
Qyzylorda oblysynyń ákiminiń aıtýynsha, Syr eliniń dıqandary sýdan tapshylyq kórip otyrǵannan keıin sý kóleminiń ulǵaıǵanyna árıne qýanady. Alaıda, eldi mekenderdiń 85 paıyzy Syrdarııanyń boıynda ornalasqan. Onda halqymyzdyń 93 paıyzy turady.
«Búginde 56 eldi mekenge, 357 myń turǵynǵa, 84 myń baspanaǵa, sharýa qojalyqtaryndaǵy 247 myń mal basyna qaýip tónip tur. Sondyqtan osy qaýiptiń aldyn alý úshin Aýyl sharýashylyǵy mınıstrligi Sý resýrstary komıtetimen, QR ІІM Tótenshe jaǵdaılar komıtetimen, sharýashylyq basshylarymen jáne jergilikti kásipkerlermen birlese otyryp, qaýiptiń aldyn alý jumystaryn jumyla júrgizip jatyrmyz. Sonymen birge ótken aptada Úkimette Shıeli aýdanynda syıymdylyǵy 600 mln. tekshe metrlik Kúmisketken sý qoımasyn salý jobasyn taǵy bir márte talqyladyq. Bul joba sý tasqynynyń aldyn alýǵa, sondaı-aq sý tapshylyǵyn boldyrmaýǵa múmkindik beredi. 15-20 mamyrǵa deıin tótenshe jaǵdaılar rejiminde jumys istep, qaýipsizdik sharalaryn josparlaǵan kestege sáıkes júrgizetin bolamyz»,- dedi Qyrymbek Kósherbaev.
