Qyrymbek Kósherbaev otbasy qundylyqtaryna negizdelgen pán engizýdi usyndy
«Qazirgi tańda jurtshylyqpen jumyla talqylaýdy qajet etetin taǵy bir kókeıkesti rýhanı taqyryp – otbasy máselesi. Jalpy, jahandaný zamanynda ult retinde saqtalyp qalý úshin otbasydaǵy urpaq tárbıesiniń máni zor. Osyǵan oraı, Bilim jáne ǵylym mınıstrliginiń orta mektepterde otbasy qundylyqtary men ulttyq tárbıege baǵyttalǵan arnaıy pán engizý boıynsha usynystar engizetin kezi keldi dep oılaımyz. Sonymen birge, belgili ǵalymdar, qoǵam qaıratkerleri men kópbalaly analardan quralǵan ata-analar uıymyn quryp, mınıstrlikpen birlesip «Otbasy – orta mektep» atty jastarǵa tárbıe berýdiń jalpyhalyqtyq ádistemesin ázirleý qajet degen oıdamyz», - dedi Memlekettik hatshy.
Qyrymbek Kósherbaev zııaly qaýym ókilderinen tyń oı pikir, usynystary bolsa ortaǵa salýyn ótindi.
«Endigi jerde Elbasy Nursultan Ábishuly Nazarbaev usynǵan «Rýhanı jańǵyrý» baǵdarlamasynyń tyń tynysy ashylady deýge ábden bolady. Jahandyq daǵdarysty jeńil eńserý úshin halyqtyń sanasyn, ómir-salty men ustanymdaryn transformatsııalaýymyz kerek. Bul turǵyda baǵdarlamanyń jańa jobalary qajet. Osy tusta barshańyzdy, ıaǵnı, zııaly qaýymdy, ártúrli áleýmettik top ókilderin ortaq pikirlesýge, jańa jobalardy birlese jasaýǵa shaqyramyz. Usynystardy máseleniń mańyzdylyǵyna qaraı, Memlekettik hatshynyń atyna tikeleı jiberýlerińizdi suraımyn. «Rýhanı jańǵyrý» baǵdarlamasy sheńberinde dúnıejúzilik pandemııa tusynda jáne odan keıingi kezeńde halyqtyń boıyna jańa qundylyqtar qalyptastyrý boıynsha usynystar engizińizder. Qajet bolǵan jaǵdaıda zııaly qaýym ókilderi, qoǵam qaıratkerleriniń qatysýymen jańa jobalar boıynsha qajetti keńester ótkizip, oı-pikirlerin jınaqtap otyramyz», - dedi ol.
Aıta keteıik, 2020 jylǵy 1 qyrkúıekte Memleket basshysy Qasym-Jomart Toqaev Parlament palatalarynyń birlesken otyrysynda Qazaqstan halqyna jyl saıynǵy dástúrli Joldaýyn jarııalady.
