Qyrymbek Kósherbaev ókilettiginiń uzartylýyna qatysty pikir bildirdi
ASTANA. QazAqparat - Qyzylorda oblysynyń ákimi Qyrymbek Kósherbaev óziniń ókilettiginiń uzartylýyna qatysty pikir bildirdi, dep habarlaıdy QazAqparat.
Budan buryn habarlanǵandaı, Memleket basshysynyń Jarlyǵymen «Qazaqstan Respýblıkasynyń memlekettik qyzmeti týraly» Qazaqstan Respýblıkasy Zańyna sáıkes, Qyzylorda oblysynyń ákimi Qyrymbek Eleýuly Kósherbaevtyń ókilettigi zeınetkerlik jasqa tolǵan kúnnen bastap 2021 jylǵy 20 mamyrdy qosa alǵandaǵy merzimge deıin uzartyldy.
«Týǵan Otanyńa, elińe qyzmet etý, Táýelsiz eldiń negizin qalaǵan Elbasynyń komandasynda jumys isteýden artyq baqyt bar ma?! Memleket basshysy baǵalap, odan ári jaýapty tapsyrma berip jatsa, týǵan elińe qyzmet etýden artyq baqyt joq qoı», - Ortalyq kommýnıkatsııalar qyzmetinde tilshiler saýalyna jaýap berý kezinde.
Osy oraıda, ol elge qyzmet etýdegi jigerin ata-babalarynan úlgi tutatynyn atap ótti.
«Meniń atam Kósherbaı ekinshi dúnıejúzilik soǵys kezinde eńbegi úshin Aralda Sotsıalıstik Eńbek Eri bolǵan. Ákem Eleý Qyzylorda oblysyndaǵy 5 aýdandy basqarǵan, birneshe ordenderdiń ıegeri. Ata-babamyzdan elge, Otanǵa qyzmet etý - bizdiń áýletimizdiń dástúri. Urpaqty da solaı tárbıeleımin. Olardyń sheneýnik bolýy mindet emes. Qaı jerde júrse de, ózderiniń mamandyǵyna sáıkes eline adal bolý kerek. Baqytymyzdy osy týǵan jerimizden izdeýimiz qajet», - dedi oblys ákimi.
