Qyrymbek Kósherbaev MMÝ Qazaqstandaǵy fılıalynyń mereıtoıyna arnalǵan sharaǵa qatysty

NUR-SULTAN. QazAqparat – M.V.Lomonosov atyndaǵy Máskeý memlekettik ýnıversıtetiniń Qazaqstandaǵy fılıalynyń 20 jyldyq mereıtoıyna arnalǵan saltanatty jıyn ótti, dep habarlaıdy Aqordanyń baspasóz qyzmeti.

Oǵan Memlekettik hatshy Q.E.Kósherbaev qatysyp, QR Tuńǵysh Prezıdenti – Elbasy N.Á.Nazarbaevtyń, Memleket basshysy Q.K.Toqaevtyń joǵarǵy oqý ornynyń mereıtoıyna oraı joldaǵan quttyqtaý jedelhattaryn oqyp berdi.

Qatysýshylar aldynda sóz sóılegen Memlekettik hatshy oqý ordasynyń mereıtoıy Qazaqstan Respýblıkasy Táýelsizdiginiń 30 jyldyǵymen tuspa-tus kelip otyrǵanyn atap, ýnıversıtet fılıaly Elbasy N.Á.Nazarbaevtyń bastamasymen ashylǵanyn aıtty.

– Máskeý memlekettik ýnıversıtetiniń alǵashqy sheteldik fılıalynyń elimizdiń elordasynda ashylýy Qazaqstan men Reseı arasyndaǵy dostyq baılanystyń jarqyn ári erekshe ekeniniń dáleli. Osynyń arqasynda buǵan deıin uzaq jyldar boıy qalyptasqan eki el arasyndaǵy ǵylym men bilim salasyndaǵy baılanys jańasha serpin aldy, – dedi Q.Kósherbaev.

Sondaı-aq Qyrymbek Kósherbaev QR Prezıdenti Q.K.Toqaevtyń tapsyrmasymen M.V.Lomonosov atyndaǵy MMÝ fılıalyna el Úkimetiniń sheshimimen jańa ǵımarat berilgenin jetkizdi. Bul eńbek naryǵyna qajetti mamandarqataryn arttyryp, joǵary dárejeli kadrlar daıyndaýǵa múmkindik beredi.

Búgingi tańda qazaqstandyq fılıal Máskeý memlekettik ýnıversıtetiniń joǵarǵy bedelin saqtap, elimizdiń bilim jáne ǵylym salasynyń damýyna aıtarlyqtaı úles qosyp keledi. Fılıal qurylǵan 20 jyl ishinde álemniń aldyńǵy deńgeıli oqý oryndarynyń standarttaryna saı irgeli bilimge ıe 2 myńnan astam maman daıarlady.