Qyrymbek Kósherbaev Qyzylorda oblysyndaǵy qos gazetti mereıtoıymen quttyqtady
Atalmysh jedelhatta:
«Qurmetti gazet redaktsııalarynyń ujymy! Sizderdi oblystyq «Syr boıy» jáne «Kyzylordınskıe vestı» gazetteriniń jaryq kórgenine 90 jyl tolǵan torqaly toılaryńyzben shyn júrekten quttyqtaımyn.
Alty Alashtyń anasy sanalǵan Syr óńiriniń tynys-tirshiligin halyqqa jetkizip kele jatqan qos basylymnyń tarıhy tereńde jatyr. Atalǵan ata basylymdar Qyzylorda júrtshylyǵyna ǵana emes, elimizdegi kózi qaraqty oqyrman qaýymǵa etene tanys. Qos gazet ǵasyrǵa jýyq ýaqytta aımaqtyń jarqyn jetistikteri men jasampaz isterin tasqa basyp, ólkeniń jylnamasyn jasaýǵa eńbek sińirip keledi.
Baıyrǵy basylymdar óskeleń urpaqqa ónege kórseter tárbıe quraly jáne jas daryndy qanattandyratyn shyǵarmashylyq sheberhana
retinde de erekshelenedi. Osynyń arqasynda qasıetti quthana ult zııalylarynyń birneshe býynynyń tulǵa bolyp qalyptasýyna ıgi yqpalyn tıgizdi.
Oblys ómirinen jan-jaqty aqparat berip otyrǵan «Syr boıy» jáne «Kyzylordınskıe vestı» gazetteriniń redaktsııa ujymdary aldyńǵy býyn salyp ketken kásibı sara joldy abyroımen jalǵastyryp, talǵamy bıik oqyrman suranysyn qanaǵattandyryp, sapaly dúnıelerimen sýsyndatyp kele jatqany qýanyshty jaıt.
Qyzylorda oblysynyń qos basylymynda qajyrly qyzmet etken ardagerler men búgingi jas býyndy jáne gazetter oqyrmandaryn aıtýly 90 jyldyq mereıtoımen quttyqtaı otyryp, barshańyzǵa eńbekte tabys, shyǵarmashylyq shabyt, otbasylaryńyzǵa baqyt tileımin», - delingen.
Búgin Qyzylorda qalasynda «Syr boıy» jáne «Kyzylordınskıe vestı» gazetteriniń 90 jyldyq mereıtoıy atalyp ótýde. Qazirge deıin A.Toqmaǵanbetov atyndaǵy mádenıet úıinde ǵylymı-praktıkalyq konferentsııa uıymdastyryldy. Onda Qyzylorda oblysynyń ákimi Qýanyshbek Ysqaqov júrekjardy lebizin bildirip, búginde qos gazettiń basyn biriktirip otyrǵan «Syr medıa» JShS-ne jańa avtokóliktiń kiltin tabys etti. Sondaı-aq, atalmysh shara barysynda jas aqyndardyń qatysýymen jyr músháırasy ótkizildi.
